Олимлар 2018 йилда кучли зилзилалар серияси юз бериши мумкинлигини башорат қилди

Ернинг ўз ўқи атрофида айланиш тезлигининг секинлашиши сабабли 2018 йилда кучли зилзилалар сони кескин ошиши мумкин. Бу ҳақда Meduza хабар берди.

Сейсмик фаолликнинг Ер ўқининг айланиш тезлигига боғлиқлиги назариясини Колорадо университетидан Рожер Билхем ва Монтана университетидан Реббека Бендик илгари сурган. Уларнинг маърузаси Америка геологик жамияти йиғилишида тақдим этилган.

Билхем ва Бендик 1900 йилдан буён юз берган 7 магнитудали ва ундан юқори кучли зилзилаларни таҳлил қилган. Олимлар бешта даврни ажратиб олган. Мазкур даврларда йиллик ўртача кўрсаткич 15 та кучли зилзилани ташкил этган шароитда, уларнинг 25—30 тагача ошиб кетгани кузатилган.

Олимларнинг маълум қилишича, сейсмик фаоллик Ер айланиш тезлиги энг паст даражага келганидан кейин беш йил ўтгач бошланган.

Ер айланиш тезлигининг сўнгги секинлашуви тахминан тўрт ярим йил аввал юз берган. Шу тариқа, назарияга кўра, 2018 йилда кучли ер қимирлашлари сонининг ошиши кутилади.

The Daily Mail’нинг ёзишича, агар 2017 йилнинг бошидан буён олтита кучли зилзила юз берган бўлса, 2018 йилда уларнинг сони 20 тага етиши мумкин.

Ер айланишининг секинлашиши билан боғлиқ кучли зилзилаларнинг асосийлари Ернинг экваториал ҳудудида юз берган бўлиб, бу ҳудудда қарийб бир миллиард киши яшайди.