Ўзбекистон Республикаси Президентининг 2017 йил 18 июлдаги «Ўзбекистон Ёшлар иттифоқи фаолиятини такомиллаштиришга доир комплекс чора-тадбирлар тўғрисида»ги ПҚ-3138-сонли қарори ижросини таъминлаш мақсадида, Ўзбекистон Ёшлар иттифоқи кўмаги остида, Марказий банк ҳамда «Ипак Йўли» АИTB Етакчилар кенгаши ташаббуси билан банклар ўртасида футзал бўйича мусобақа ўтказилди.
Мусобақа жорий йилнинг 18—19 ноябрь кунлари Тошкент молия институтининг спорт-соғломлаштириш мажмуасида бўлиб ўтди.
Таъкидлаш ўринлики, 1—4 ноябрь кунлари Тошкент вилоятининг Бўстонлиқ туманида Ўзбекистон Ёшлар иттифоқи Марказий кенгаши ташаббуси билан ўқув-семинар ташкил этилган эди. Бу семинарда Ёшлар иттифоқининг вазирлик, идора ва ташкилотлардаги етакчилар кенгаши олдига бир қанча устувор вазифалар қўйилиб, чора-тадбирлар ишлаб чиқилди. Оммавий тадбирлар ва спорт-саломатлик йўналишидаги ушбу мусобақа ўқув-семинарда белгилаб берилган вазифаларнинг кичик бир таркибий қисми ҳисобланади.
Мусобақани ўтказишдан асосий мақсад — фақатгина футбол ўйнаш бўлиб қолмасдан, балки республика банк тизимидаги ёш кадрлар билан яқиндан танишиш, амалга оширилаётган ишлар юзасидан ўзаро фикр-мулоҳазалар алмашиш ҳамда ҳамжиҳатликда ҳаракат қилишдан иборатдир.
Мусобақада 31 ёшгача бўлган республика банк тизимида фаолият юритувчи ёш ходимлардан иборат 16 та жамоа 4 та гуруҳга бўлинган ҳолда иштирок этди. Қизғин курашларга бой бўлган мусобақа 2 кун давом этди ва якунда барча рақибларни мағлубиятга учратган «Ўзсаноатқурилишбанк» АTB ёш ходимларидан иборат бўлган жамоа ғолибликни қўлга киритди.
Юртбошимиз Шавкат Мирзиёев таъкидлаганларидек, мамлакатимизда амалга оширилаётган барча ислоҳот ва ўзгаришлар, кенг кўламли дастурлар ягона ва улуғ бир мақсадга қаратилган. У ҳам бўлса халқимиз ҳаётини янада обод ва фаровон қилиш, фарзандларимизни ҳар томонлама етук ва баркамол этиб тарбиялашдан иборат. Бу каби турнирлар ёшлар онгига соғлом турмуш тарзини чуқур сингдиришда муҳим восита бўлиб хизмат қилади.
Реклама ҳуқуқи асосида
Изоҳ (0)