O‘zbekiston Respublikasi Prezidentining 2017-yil 18-iyuldagi “O‘zbekiston Yoshlar ittifoqi faoliyatini takomillashtirishga doir kompleks chora-tadbirlar to‘g‘risida”gi PQ-3138-sonli qarori ijrosini ta’minlash maqsadida, O‘zbekiston Yoshlar ittifoqi ko‘magi ostida, Markaziy bank hamda “Ipak Yo‘li” AITB Yetakchilar kengashi tashabbusi bilan banklar o‘rtasida futzal bo‘yicha musobaqa o‘tkazildi.
Musobaqa joriy yilning 18—19-noyabr kunlari Toshkent moliya institutining sport-sog‘lomlashtirish majmuasida bo‘lib o‘tdi.
Ta’kidlash o‘rinliki, 1—4-noyabr kunlari Toshkent viloyatining Bo‘stonliq tumanida O‘zbekiston Yoshlar ittifoqi Markaziy kengashi tashabbusi bilan o‘quv-seminar tashkil etilgan edi. Bu seminarda Yoshlar ittifoqining vazirlik, idora va tashkilotlardagi yetakchilar kengashi oldiga bir qancha ustuvor vazifalar qo‘yilib, chora-tadbirlar ishlab chiqildi. Ommaviy tadbirlar va sport-salomatlik yo‘nalishidagi ushbu musobaqa o‘quv-seminarda belgilab berilgan vazifalarning kichik bir tarkibiy qismi hisoblanadi.
Musobaqani o‘tkazishdan asosiy maqsad — faqatgina futbol o‘ynash bo‘lib qolmasdan, balki respublika bank tizimidagi yosh kadrlar bilan yaqindan tanishish, amalga oshirilayotgan ishlar yuzasidan o‘zaro fikr-mulohazalar almashish hamda hamjihatlikda harakat qilishdan iboratdir.
Musobaqada 31 yoshgacha bo‘lgan respublika bank tizimida faoliyat yurituvchi yosh xodimlardan iborat 16 ta jamoa 4 ta guruhga bo‘lingan holda ishtirok etdi. Qizg‘in kurashlarga boy bo‘lgan musobaqa 2 kun davom etdi va yakunda barcha raqiblarni mag‘lubiyatga uchratgan “O‘zsanoatqurilishbank” ATB yosh xodimlaridan iborat bo‘lgan jamoa g‘oliblikni qo‘lga kiritdi.
Yurtboshimiz Shavkat Mirziyoyev ta’kidlaganlaridek, mamlakatimizda amalga oshirilayotgan barcha islohot va o‘zgarishlar, keng ko‘lamli dasturlar yagona va ulug‘ bir maqsadga qaratilgan. U ham bo‘lsa xalqimiz hayotini yanada obod va farovon qilish, farzandlarimizni har tomonlama yetuk va barkamol etib tarbiyalashdan iborat. Bu kabi turnirlar yoshlar ongiga sog‘lom turmush tarzini chuqur singdirishda muhim vosita bo‘lib xizmat qiladi.
Reklama huquqi asosida
Izoh (0)