MyDay нашри Instagram ижтимоий тармоғи орқали мухлисларини ижоди ва ҳаётидаги янгиликлар билан бохабар қилиб борадиган, энг кўп кузатувчиларга эга санъаткорлар ҳақида маълумот берди.
Йигитали Мамажонов, актёр (419 минг)
Рўйхатнинг ўнинчи поғонасини актёр Йигитали Мамажонов эгаллади. У кўпроқ клиплардаги роллари билан танилган. Лекин ҳақиқий машҳурлик таниқли хонанда Райҳон Ғаниева билан турмуш қургач келган.
Али Отажонов, хонанда (430 минг)
Хонанда нафақат қўшиқлари, балки кинолардаги роллари билан ҳам машҳур. Хонанда машҳур Отажоновлар сулоласининг вакили бўлиб, Ортиқ Отажоновнинг набираси.
Адиз Ражабов, актёр (502 минг)
Адиз Ражабовнинг танилишига ёрдам берган илк фильми «Наҳотки сен» бўлиб, қора қошли йигитча бир зумда минглаб мухлислар қалбидан жой олган.
Шохрух рэпер (530 минг)
Ўзбек шоу-бизнесининг илк рэперларидан бири Шохруҳ катта саҳнага илк бор Тарона Шоу 2004 тақдирлаш маросимида қадам қўйган. Унинг «Ҳаёт», «Баландда», «Хайр, бевафо», деб номланган тароналари узоқ вақт хит-парадларнинг юқори поғоналаридан тушмаган.
Алишер Узоқов, актёр, режиссёр (608 минг)
Ўзининг комик роллари билан танилган Алишер Узоқов сўнгги пайтларда киноларда камнамо. Бир неча йиллик танаффусдан сўнг, у режиссёр сифатида кинога қайтди. Ҳозирда уни ЗўрТВ телеканалида The Cover up лойиҳасининг бошловчиси сифатида кўриш мумкин.
Даврон Кабулов, бошловчи (660 минг)
«Миллион» жамоасининг аъзоси Даврон Кабулов аччиқ ҳазиллари ва сўзга усталиги билан кўплаб мухлислар орттирган. Мухлислари нафақат унинг ижодини, балки шахсий ҳаётини ҳам катта қизиқиш билан кузатадилар.
Сардор Раҳимхон, хонанда (681 минг)
Ўзбекистонда хизмат кўрсатган артист Сардор Раҳимхон аввалига радио бошловчиси сифатида танилган. Қўшиқ куйлашга бўлган иштиёқи устунлик қилиб, хонандаликка қўл урган. Унинг «Ишонмасман» деб номланган илк таронаси ҳақиқий хит даражасига кўтарилган.
Улуғбек Раҳматуллаев, хонанда (838 минг)
Ўзбекистонда хизмат кўрсатган артист Улуғбек Раҳматуллаев илк бор 1999 йилда «Ёрим ёнига борсам» қўшиғи билан катта саҳнага қадам қўяди, лекин ҳақиқий машҳурлик 2004 йилда «Ойдин кечалар» қўшиғидан сўнг келади.
Жаҳонгир Позилжонов, хонанда (868 минг)
«Божалар» гуруҳининг солисти Жаҳонгир Позилжонов ўзининг қувноқ қўшиқлари ва кинолардаги комедик роллари билан машҳур. Маълумот ўрнида, «Божалар» гуруҳи 2004 йилда ташкил топган бўлиб, 2009 йилга қадар икк нафар солист, Мўмин Орипов ва Жаҳонгир Позилжоновдан иборат бўлган. 2009 йилда гуруҳ вакили Мўмин Орипов бевақт вафот этгач, Жаҳонгир гуруҳга бошқа иштирокчи олмасликка қарор қилади ва ўзи яккахон хонанда сифатида куйлашни бошлайди.
Шоҳруххон, хонанда (919 минг)
Бугунги ўнталикнинг энг юқори поғонасида миллионлаб мухлислар қалбини забт этган хонанда Шоҳруҳхон. У қўшиқ куйлашдан ташқари актёрлик соҳасида ҳам ўзини синаб кўрган.
Изоҳ (0)