Американинг Apollo 11 космик кемаси Ой модулининг 18 каратли олтиндан ясалган модели Массачусетс штати Бостон шаҳрида бўлиб ўтган кимошди савдосида 122,3 минг долларга сотилди, деб ёзади «ТАСС».
RRAuctions аукцион уйи маълумотларига кўра, лотга 26 киши даъвогарлик қилган. Франциянинг соат ва заргарлик буюмлари ишлаб чиқарувчи Cartier компанияси томонидан тайёрланган моделнинг якуний нархи (харидорнинг аукцион уйига тўловини ҳам ҳисобга олганда) 134,5 минг доллардан ошди.
846 граммлик модель 1969 йилнинг июлида Apollo 11 кемаси модулида Нил Армстронг билан бирга Ойга қўнган америкалик астронавт Базз Олдринга тегишли бўлган.
Cartier компанияси заргарлари Le Figaro газетаси буюртмасига кўра бундай митти нусхалардан учтасини ясаб, Apollo 11 экипажи аъзолари Армстронг, Олдрин ва Майкл Коллинзга уларнинг Парижга ташрифи чоғида топширган эди.
Изоҳ (0)