Ер тарихидаги илк юлдузлараро саёҳат учун номзодлар танланди

Юлдузлараро саёҳатлар бўйича экспертлар Ер тарихидаги илк Қуёш тизимидан ташқарига сафар учун номзодларни танлади. Бу ҳақда «Наука» хабар бермоқда.

Санта-Барбарадаги Калифорния университетининг Starlight дастури раҳбарларига кўра, Caenorhabditis elegans чувалчанги ва Tardigrada секинюрари илк юлдузларо саёҳат учун энг мақбул номзодлар.

Маълум бўлишича, Caenorhabditis elegans чувалчанги бутун дунё бўйлаб тўпланган барча тупроқ намуналарида истиқомат қилади. Tardigrada секинюрари эса яшовчанлиги билан машҳур: у ноқулай шароитда йиллар мобайнида анабиоз ҳолатига тушиш, сўнг тезда ўзига келишга қодир.

Шунингдек, 20 даража совуқда 30 йил яшаши, 10 соат давомида 60-65 даража ҳароратни кўтариши ва 570 минг рентгенга бардош бериши мумкин. Таққослаш учун, инсонни ҳалок қилиш учун 500 рентген етарли.

Чувалчанг ва секинюрар коинотда бўлишга улгурган: улар олдинроқ Халқаро коинот станцияси бортида Ер орбитаси бўйлаб айланганди.