Франциялик собиқ ҳимоячи Эрве Ренар ҳақида кўпчилик билмаса керак, деб савол қўйди «Championat.asia» Brfootball нашрига асосланиб. Тўғри, у футболчи сифатида ўртамиёна клубларда тўп сурди ва ном қозона олмади. Аммо мураббий сифатида тарихга кирди.
1968 йилда дунёга келган Ренар ЖЧ—1998 якунига қадар футболчи бўлиб юрди. Кейинроқ мураббий сифатида ҳам номи чиқмаган жамоаларда фаолият олиб борди. Бу йўли уни Африка сари етаклади.
Ҳеч ким танимайдиган франциялик мутахассисни қора қитъанинг кучли термалари чақириши мумкин эмасди. Минтақада ўртамиёналардан ҳам бироз кучсизроқ бўлган Замбия унга эшикларини очди ва терма жамоани Африка Миллатлар Кубогига тайёрлашни сўради.
Ренар 2011 йил ишга киришди. Орадан бир йил ўтиб, Замбия сенсацион равишда Африка ғолиби бўлди. Габон ва Экваториал Гвинея қўшмезбонлигида ўтган мусобақа финалида Замбия Кот-д’Ивуарни пенальтилар сериясига кўра таслим қилди. Мали, Гана, Миср, Марокаш, Тунис, Сенегал, Нигерия, Камерун каби етакчилар бир четда қараб қолаверди.
Бу қаҳрамонлик Эрве Ренарни Кот-д’Ивуар сари етаклади. Мутахассис 2014 йил мамлакат футболида иш бошлади. 2015 йил эса Кот-д’Ивуар Африка Миллатлар Кубогини боши узра баланд кўтарди. Финалда Ренар шогирдлари Гана билан тўқнаш келди. Ўз вақтида Замбия пенальтилар сериясида 8:7 ҳисобида устун келганди, ивуарликлар эса янада сермаҳсуллик кўрсатишди — 9:8.
Хўш, шундай мутахассисни Африка қитъаси қўйиб юборармиди? Албатта, йўқ! Ахир у Замбияни тарихда илк бор чемпион қилди, Ивуар термасига 23 йиллик қувончни қайтарди.
Марокаш термаси Ренарни таклиф қилди. Боиси мамлакат бош жамоаси 1998 йилдан буён мундиал юзини кўрмай келаётганди. Ноябрнинг дастлабки 10 кунлигида Эрве Ренар марокашлик мухлислар учун ҳам қаҳрамонга айланди. Энди Марокаш Россия—2018 га келади.
Изоҳ (0)