«Сен Ёлғиз Эмассан» фонди «Умид ришталари» француз уюшмасининг болалар кардиожарроҳлари билан биргаликда Ўзбекистондаги Меҳрибонлик уйи тарбияланувчилари ва кам таъминланган оила фарзандларига жарроҳлик ёрдамини кўрсатиш хайрия акциясини давом эттирмоқда, деб ёзади Лола Каримова-Тиллаева ўзининг Facebook’даги саҳифасида. Октябрь ойида Тошкентда француз кардиожарроҳлари томонидан туғма юрак нуқсони билан туғилган болаларга бугунги кунда Ўзбекистонда амалга оширилмайдиган мураккаб жарроҳлик операциялари бажарилди.
4—10 октябрь кунлари Академик В. В. Воҳидов номидаги Республика ихтисослаштирилган жарроҳлик марказида француз кардиожарроҳлари томонидан Ўзбекистоннинг турли вилоятларидаги кам таъминланган оила фарзандларидан 9 нафар болага жарроҳлик амалиёти бажарилиб, 45 нафар бола тиббий кўрикдан ўтди.
3 ёшли Шомирзаев Шаҳбоз (Сурхондарё вилояти), 2 ёшли Шавкатова Паризода ва 4 ёшли Ўктамов Шерзод (Жиззах вилояти), 1 ёшли Мўйдинов Умиджон (Фарғона вилояти), 13 ёшли Ҳошимова Маҳбуба ва 8 ёшли Олимжонов Авазбек (Наманган вилояти), 3 ёшли Мордвинов Арсен (Тошкент шаҳри), 12 ёшли Жамолов Миржалол ва 3 ёшли Жомурадова Меҳринигорларга (Қашқадарё вилояти) мураккаб жарроҳлик амалиёти бажарилди. «ВПС. Тетрада Фалло. Ўпка артерия атрезияси. ОAП» ташхисли Жомурадова Меҳринигорга мазкур хайрия акцияси доирасида иккинчи маротаба операция амалга оширилиши, жарроҳлик амалиётининг илк босқичи қизалоққа 2016 йилнинг сентябрида ўтказилган эди.
«Барча болажонлар тезда соғайиб кетишларини тилайман. Мазкур акцияда иштирок этган шифокорларга – профессор Оливе Барон бошчилигидаги француз кардиожаррохлар гуруҳига, Академик В. В. Воҳидов номидаги Жарроҳлик марказининг шифокорларига юксак касбий маҳоратлари ва ҳар бир болажонга алоҳида кўрсатилган ғамхўрликлари учун ўз миннатдорлигимни изҳор этаман», — дея қайд этди Лола Каримова-Тиллаева.
Изоҳ (0)