28 октябрь куни тунда Тошкент шаҳар 1-клиник шифохонасига 20 ёшли Олим Туропов қорни ва чап сонидаги кесилиш жароҳати билан мурожаат қилган, деб хабар беради «Nuz.uz».
Шифокорлар мазкур маълумотни 102 хизматига етказган.
«Мазкур мурожаат асосида ҳодиса жойига тезкор-қидирув гуруҳи юборилди. Жиноятни содир этишга ундаган сабабларни таҳлил этиш натижасида Ц-5 даҳасидаги кўп қаватли уйлар олдида кечқурун бир неча ўспиринлар спиртли ичимликлар ичгани маълум бўлди. Шу пайтда уларнинг ёнидан алкоголли ичимлик таъсирида бўлган яна икки ёш йигит ўтиб, улардан сигарет сўраган. Шундан сўнг йигитлар ўртасида жанжал бошланган. Оқибатда эса икки киши жароҳатланган», — дейди Тошкент шаҳар ИИББ бошлиғи ўринбосари Дониёр Тошхўжаев.
Шунингдек, ҳуқуқ-тартибот органи ходимларининг аниқлашича, спиртли ичимлик ичган ёшлар орасида вақтинча ишсиз тўрт нафар йигитлар ва уч нафар қизлар, туризм, транспорт ва Боровский номидаги тиббиёт коллежлари талабалари ҳам бўлган.
Дониёр Тошхўжаев қизларнинг энг кичиги 16, энг каттаси эса 19 ёшда бўлганини алоҳида таъкидлаб ўтган.
Атрофдаги уйларда яшовчилар аҳоли турар-жойлари ҳовлисида тунда ёшлар спиртли ичимлик ичаётгани ҳақида милицияга хабар бермаган.
Ёшлар ўртасидаги жанжал уларнинг спиртли ичимлик таъсирида бўлгани сабабли юзага келган. Ҳақоратли сўзлар билан бошланган жанжалда ўспиринлардан бири Самандархон Бузурхонов чўнтагидан сувенир пичоқ чиқариб Баҳодир Маҳмудовга тан жароҳати етказган.
Бироқ, жабрланувчи пичоқни тортиб олган ва Самандархоннинг дўсти Олим Туроповга қарата зарба берган. Баҳодир Маҳмудовнинг ўзи эса ҳодиса жойидан яширинган.
Мазкур ҳолат бўйича Юнусобод тумани ИИБ томонидан жиноий иш қўзғатилган.
Ўтказилган тезкор-қидирув ҳаракатлари натижасида мазкур жиноятни муқаддам судланган Баҳодир Маҳмудов ва Иброҳим Орифжонов содир этганлиги аниқланиб ушланди.
Изоҳ (0)