Мирзо Улуғбек номидаги Ўзбекистон Миллий университетида Ўзбекистон халқ артисти, «Фидокорона хизматлари учун» ва «Дўстлик» орденлари соҳибаси Галина Мельникова иштирокида навбатдаги маҳорат дарси бўлиб ўтди, деб ёзади «Telegraf.uz».
Галина Мельникова кўплаб истеъдодли сухандонларни эфирга олиб чиққан устозлардан ҳисобланади. Талабалар билан бўлган самимий мулоқотда у босиб ўтган ҳаёт йўли, тележурналистиканинг машаққати ва шарафли йўли хусусида тўхталди.
Маҳорат дарсида журналист кадрлар тайёрлаш ва қайта тайёрлаш, уларнинг малакасини ошириш тизимини такомиллаштириш, ўқув жараёнини замонавий ахборот-коммуникация технологиялари билан бойитиш, талабаларнинг амалий билим ва кўникмаларини шакллантириш, «устоз-шогирд» анъанасини ривожлантириш масалалари хусусида фикр алмашилди.
Талабалар машхур сухандон-журналистга ўзларини қизиқтирган саволларни берди ва атрофлича жавоб олди.
Маълумот учун, Галина Виталевна Мельникова 1936 йил 23 декабрь куни туғилган. У 1956 йилдан бери телевидение соҳасида ишлаб келмоқда.
Олий тоифали диктор Галина Мельникова «Дўстлик» ордени, Ўзбекистонда хизмат кўрсатган артист унвони, «Олтин қалам» мукофоти ва Россиянинг Пушкин номидаги медали билан тақдирланган.
Изоҳ (0)