Facebook компанияси асосчиси Марк Цукерберг келгусида АҚШда бўлиб ўтадиган сайлов жараёнларига ўзи яратган ижтимоий тармоқ орқали аралашувга йўл қўймасликка жиддий киришди, деб хабар беради «ТАСС».
Цукерберг мазкур қарорини инвесторлар билан учрашувда айтиб ўтди.
«Мен аввал ҳам айтгандим, россияликлар бизнинг воситамизда шубҳа тарқатишга уринди, бундан ғазабдаман. Уларнинг иши нотоғри. Мен бу борада жиддийман», — дейди Цукерберг.
Facebook асосчиси шунингдек, компания хавфсизлик бўлимига яна 20 минг кишини ишга олишни режалаштираётганини ҳам маълум қилди. У келгусида конгресс ва разведка билан ҳамкорликда иш юритишини ҳам айтиб ўтган.
АҚШ конгрессида бир неча кундан бери гўёки бир неча Россия структуралари томонидан сохта аккаунтлар орқали ижтимоий тармоқда сиёсий характерга эга маълумотни тарқатганлигига бағишланган эшитув бўлиб ўтмоқда.
Америка қонунчилиги вакиллари Москва шу тарзда 2016 йилда АҚШдаги сайловлар олдидан жамоатчилик ўртасида низо уруғини сочишга уринганини тахмин қилмоқда.
Изоҳ (0)