АҚШ ҳукумати «Грин кард» виза лотереясини жорий босқичда тўхтатмайди ва унга ҳеч қандай ўзгартириш киритмайди. Бу ҳақда АҚШ Давлат департаменти расмий вакили маълум қилди, дея хабар бермоқда «Коммерсантъ».
«Ҳозирги вақтда қонун билан белгиланган ‘Турли миллатга мансуб иммигрантлар визаси’ дастурига ҳеч қандай ўзгартиришлар киритилмаяпти. Бу масала юзасидан қолган ахборот учун Оқ уйнинг 8 октябрдаги баёноти билан танишиб чиқишни тавсия қиламиз», — деди Давлат департаменти вакиласи.
Дипломат тилга олинган ва Оқ уй матбуот котиби Сара Сандерс номидан тарқатилган баёнотда, хусусан, иммиграцион визалар ўйналадиган «Грин кард» лотереясини тугатишга чақириқ бор. Баёнотда таъкидланишича, ушбу виза дастурида қатнашувчи аксарият чет элликларнинг АҚШ билан ҳеч қандай алоқаси йўқ, улар бирор амалий кўникмага эга эмас ва таълим даражаси ҳам чекланган.
Эслатиб ўтамиз, Нью-Йоркда 31 октябрь куни юз берган терактдан сўнг, АҚШ президенти Дональд Трамп фуқаролари АҚШ ҳудудига кириши чекланган мамлакатлар рўйхатини кенгайтиришга ваъда берган, шунингдек, «Грин кард» виза лотереясини танқид қилган эди.
Маълумот учун, Нью-Йоркда теракт келиб чиқиши ўзбекистонлик Сайфулло Соипов томонидан амалга оширилгани гумон қилинмоқда. У полиция томонидан ҳибсга олинган. Теракт оқибатида 8 киши ҳалок бўлган, 11 киши тан жароҳати олган.
Изоҳ (0)