Нью-Йоркда 31 октябрь куни юз берган терактдан сўнг, АҚШ ҳукумати Ўзбекистонни фуқаролари АҚШ ҳудудига кириши тақиқланган мамлакатлар рўйхатига киритиши мумкинлигини истисно қилмаяпти. «Коммерсантъ» хабарига кўра, бу ҳақда Оқ уй матбуот котиби Сара Сандерс маълум қилган.
Ўзбекистон мазкур рўйхатга киритиладими ёки йўқ, деган саволга жавоб бераркан, Сандерс хоним жумладан шундай деди: «Биз ҳозирда бунга чорлаётганимиз йўқ, бироқ, албатта, буни истисно ҳам қилмаймиз».
Аввалроқ АҚШ президенти Дональд Трамп Нью-Йоркдаги терактни содир этишда гумон қилинаётган келиб чиқиши ўзбекистонлик Сайфулло Соипов АҚШга «Грин кард» лотерея дастури орқали келганини маълум қилган эди.
1990 йилдан бери амалда бўлган мазкур дастур АҚШда доимий яшаш ва ишлаш ҳуқуқини қўлга киритиш имконини тақдим этади. АҚШ Давлат департаменти маълумотларига кўра, 2016 йилда 46,7 минг киши айнан «Грин кард» орқали иммиграция визаларини қўлга киритган.
Улардан 2,4 минг нафари Ўзбекистон фуқароларидир. Таъкидлаш жоиз, лотерея ғолиблари компьютер орқали тасодифий танлов йўли билан аниқланади.
Изоҳ (0)