Ўзбекистон Президенти Шавкат Мирзиёев ҳар 10 кунда Tashkent City халқаро бизнес марказининг қурилиш лойиҳаси қай йўсинда амалга оширилаётганини шахсан назорат қилишини айтди. Бу ҳақда «Ахборот 24» дастурига таяниб, «Газета.uz» хабар берди.
«Tashkent City — бу биз жаҳон ҳамжамиятига ўзимизни намоён қилишимизга имкон берувчи объект. Бу тарих, Тошкентга янгилик керак… Бизнинг ўйланиб ўтиришга вақтимиз йўқ», — деди 28 октябрь куни қурилиш жойига ташриф буюрган Президент.
Мазкур замонавий комплекс Тошкентнинг Алишер Навоий, Олмазор, Ислом Каримов ва Фурқат кўчалари оралиғидаги 80 гектар ҳудудда барпо этилади. Лойиҳага мувофиқ Tashkent City’да бизнес марказлар, савдо мажмуалари, меҳмонхоналар, офислар, конгресслар зали, кўргазма заллари, кўп қаватли замонавий уйлар, ресторанлар, сунъий кўл, фавворалар, ижтимоий ва бошқа объектлар қурилади.
Марказни лойиҳалаштириш ва қуришга Ўзбекистон ва хорижий давлатларнинг етакчи лойиҳа институтлари, чет эллик инвесторлар жалб этилмоқда.
Tashkent City давлат универ корхонасининг директори Жаҳонгир Ортиқхўжаевнинг маълум қилишича, лойиҳани амалга ошириш учун машҳур немис компанияси жалб этилган. Лойиҳа тўрт йилга мўлжалланган ва икки босқичда амалга оширилади. Биринчи босқич — 2020 йилнинг май ойига қадар, иккинчиси эса —2021 йилнинг охирига қадар.
Бу ерга 1,75 миллион квадрат метр бинолар, 16 гектар майдонга эга автотураргоҳлар, 2 гектар жойни эгалловчи сунъий кўл қурилиши режалаштирилмоқда.
Давлат архитектура ва қурилиш қўмитасининг раиси Ботир Зокировнинг айтишича, Tashkent City концепциясини тайёрлаш устида саккиз ой иш олиб борилган. Натижада турли ташкилотлардан еттита концепция, жумладан, Ўзбекистон институтлари ва хориж архитектура компаниялари томонидан тақдим этилган.
Лойиҳанинг мастер-режасини Туркиянинг Tabanlıoğlu Architect компанияси яратган, деб хабар берди Tashkent City бошқармасининг раҳбари Баҳром Ризаев.
Изоҳ (0)