АҚШнинг Флорида университети халқаро санъат галереясида 1 сентябрдан 28 октябргача ўтказилган «Ўзбекистон — Марказий Осиёнинг мўъжизавий эртаги» кўргазмаси якунига етди. Бу ҳақда «Nuz.uz» хабар бермоқда.
Кўргазмани дизайн ва меъморчилик факультети талабаси, Фулбрайт стипендиати, ўзбекистонлик Альбина Хартнер ташкиллади. Ундан мамлакатнинг қадимий ва бой тарихи, маданияти ҳақида ҳикоя қилувчи сопол буюмлар, турли-туман анвойи матолар ўрин олди.
Шунингдек, ўзбекистонлик таниқли фоторассом Эрнест Куртвелиев суратлари алоҳида блокда намойиш этилди.
Кўргазма доирасида турли мавзулардаги, хусусан, Ўзбекистон ва Марказий Осиё меъморчилигига оид маърузалар тингланди, ўзбек халқ рақсларидан маҳорат сабоқлари ўтилди.
«Ўзбекистон — Марказий Осиёнинг мўъжизавий эртаги»ни ўтган вақт мобайнида 10 мингдан ортиқ киши келиб кўрди, маҳаллий ОАВда кенг ёритилди. Альбина Хартнернинг кўргазма ташкил этиш ташаббуси Флорида университети, кўплаб фирма ва компаниялар томонидан қўллаб-қувватланди, АҚШ ва Грузиядаги хусусий фондлар томонидан молиявий кўмак берилди.
Изоҳ (0)