«Ўзбеккино» миллий агентлигида ўзбек тилига давлат тили мақоми берилганлигининг 28 йиллиги муносабати билан «Ўзбекистон Республикасининг давлат тили ўзбек тилидир» мавзусида анжуман ўтказилди. Бу ҳақда агентлик матбуот хизмати хабар бермоқда.
Анжуманда соҳа вакиллари, сценаристлар, ёзувчи-адиблар, адабиётшунос ва тилшунос олимлар, кинорежиссёрлар, кино танқидчилар ва ОАВ вакиллари иштирок этди.
Анжуманни агентлик бош директори Фурқат Зокиров кириш сўзи билан очди. У йиғилганларни ташриф билан қутлаб, бугунги кунда миллий кинематографиянинг мавжуд ютуқ ва камчиликлари, хусусан тил билан боғлиқ муаммолар ва уларни бартараф этиш йўлида олиб борилаётган амалий ишлар ҳақида гапириб ўтди.
Кейинги вақтларда «Ўзбеккино» миллий агентлиги раҳбарияти томонидан олиб борилаётган амалий ишлар натижасида соҳада илгари силжишлар, қатор янги лойиҳалар кўзга ташланмоқда. Жумладан, кинотанқидчиларнинг фикрича, шу кунларда премьераси бўлиб ўтган «Абу Али Ибн Сино» бадиий-публицистик ҳужжатли ва «Ришта» бадиий фильмлари томошабинни ўйлашга, тафаккур қилишга ундайди, унга маънавий озуқа беради.
Анжуманга йиғилганлар соҳага оид яна бошқа қатор масалалар юзасидан ўз фикр-мулоҳазаларини билдирди. Тадбир якунида кино санъатига оид шу каби анжуманларни тез-тез ташкил этишга, мавжуд камчиликларни ўзаро баҳс-мунозара орқали бартараф этишга келишиб олинди.
Изоҳ (0)