Тошкент метрополитенининг «Дўстлик» станциясидан Қўйлиқ бозори йўналиши бўйлаб бошланган янги бўлаги қурилишига доир янги расмий маълумотлар эълон қилинди. Бу ҳақда ЎзА хабар берди.
Умумий узунлиги 52,1 километрдан иборат бўлган ва «Тошкент ер усти ҳалқа метро линияси» деб аталаётган мазкур метро йўналишининг 50,5 километри баландлиги 6 метрлик эстакадалар орқали ўтказилади, 1,6 километри ер устида қурилади.
Фото: «Дарё» / Мадина Нурман
Қайд этишларича, 2017—2021 йилларга мўлжалланган лойиҳа беш босқичда амалга оширилади.
Дастлабки босқичда Тошкент метрополитенининг «Дўстлик» бекатидан Қўйлиқ бозоригача бўлган қисми қурилади. Узунлиги 11 километр бўлган ушбу қисмда 8 та бекат бунёд этилиши мўлжалланмоқда. ЎзА ахборотида лойиҳанинг дастлабки босқичи бажарилиш муддати ҳақида маълумот берилмаган.
Иккинчи босқич Қўйлиқ бозори билан «Олмазор» бекатини боғлайди. Учинчи босқичда «Олмазор»дан «Беруний» бекатигача бўлган қисм барпо этилади. Тўртинчи босқичда иншоот «Беруний»дан «Бодомзор» бекатигача қурилади, сўнгги — бешинчи босқичда линия яна «Дўстлик» бекатига уланади.
Изоҳ (0)