Боровский номида тиббиёт коллежининг марҳум талабаси Жасурбек Иброҳимов ўлими бўйича олиб борилаётган суд эшитувлари якуний босқичга кирди. Ушбу ишни кўриб бораётган Жиноят ишлари бўйича Тошкент шаҳар Миробод тумани суди судьяси Матчонбой Матчонов 30 октябрь куни ўз ҳукмини ўқийди. Бу ҳақда «Kun.uz»га таяниб, UzNews хабар берди.
27 октябрь кунги суд мажлисида жабрланувчи номидан иштирок этаётган Нилуфар Алиева, унинг адвокати Лола Исмоилова, судланувчи Исломбек Тўлагановнинг адвокатлари Ю.Иброҳимов, Ф.Тоҳиров мазкур иш бўйича ўз хулосаларини тақдим қилган.
Нилуфар Алиева ҳамда адвокат Лола Исмоилова ўз кўрсатмаларида тергов жараёни ва суд мажлисларида ўзлари қайд қилган бир-бирига зид бўлган жиҳатларни маълум қилди ҳамда жиноий ишни гуруҳ бўлиб ўлимга олиб келган тан жароҳати етказиш, дея қайта тавсифлашни сўраи. Нилуфар Алиева ҳамда Лола Исмоилова прокурорнинг судланувчига 6 йил муддат сўрагани, унинг суд жараёнида иштирок этган гувоҳлар кўрсатмаларида айрим мос келмаган жиҳатларга эътибор бермаганини таъкидлади. Улар суддан одил ҳукм чиқаришни сўради.
Судланувчи Ислом Тўлагановнинг адвокатлари Ф.Тоҳиров ва Ю.Иброҳимов Жасурбек ишида ўз ҳимоясидаги шахснинг айби камлигини, яъни унинг Жасурбекка тан жароҳати етказиш ёки уни қасддан ўлдириш нияти бўлмагани, бундан ташқари, жиноятни содир этган вақтда вояга етмагани, асосий айбдор томон ўз вақтида аниқ ташхис қўймаган ва жарроҳлик амалиётларини ўтказмаган тиббиёт ходимлари эканини эътиборга олган ҳолда Исломбек Тўлагановни жазодан озод қилишни сўрашди.
Шундан сўнг, судланувчи Исломбек Тўлагановга сўнгги сўз берилди. У жабрланувчининг ота-онасидан узр сўраган ҳолда бўлган фожиадан афсусдалигини билдирди ҳамда адвокатлари фикрига қўшилишини айтди.
Судья Матчонбой Матчонов 30 октябрь куни якуний ҳукм ўқилишини билдирди.
Изоҳ (0)