20 октябрь куни Сурхондарё вилояти халқ депутатлари Денов туман Кенгашининг навбатдан ташқари сессияси бўлиб ўтди, деб хабар беради вилоят ҳокимлиги ахборот хизмати.
Унда асосий эътибор халқ билан мулоқот қилиш, жисмоний ва юридик шахсларнинг мурожаатлари билан ишлаш, туманни ижтимоий-иқтисодий ривожлантириш масалалари таҳлилига қаратилиб, ташкилий масала кўриб чиқилди.
Сессияда сўнгги вақтларда туман аҳолисидан тушаётган мурожаатлар сони кўпайганини, муаммо ва масалаларни ҳал этишга эътиборсизлик билан қаралиб, уларнинг 85 фоизига фақатгина тушунтиришлар берилгани, туманда ободонлаштириш, куз-қиш мавсумига тайёргарлик жараёни талаб даражасида эмаслиги, уй-жой фондида кўплаб муаммолар юзага келаётгани, табиий газ ва электр энергиясидан қарздорликнинг ошиб бораётгани ҳамда экспорт параметрлари бўйича кўрсаткичлар паст даражада эканини алоҳида таъкидланди.
Бу борада ишни тизимли ташкил эта олмагани боис туман ҳокими Баҳром Маматқулов эгаллаб турган лавозимидан озод этилди.
Шунингдек, туман фаоллари, кенг жамоатчилик, сиёсий партиялар вакилларининг таклиф ва мулоҳазалари инобатга олиниб, туман ҳокими лавозимига Улуғбек Қосимов номзоди бир овоздан тасдиқланди.
У.Қосимов мутахассислиги бўйича юрист, шу кунга қадар Музработ тумани ҳокими лавозимида ишлаб келган.
Изоҳ (0)