UZ миллий домен ҳудуди маъмурияти UZINFOCOM маркази тимсолида Осиё-Тинч океани юқори даража доменлари ассоциациясига (APTLD) қўшилди. Бу ҳақдаги қарор ассоциация аъзоларининг Тбилисида бўлиб ўтган 72-конференциясида тузилма бошқаруви томонидан бир овоздан қабул қилинди, дея хабар беради UZINFOCOM.
Шу муносабат билан 18 октябрь куни ассоциация ижроси директори Леонид Тодоров Тошкентга келди ва марказ раҳбарияти билан музокаралар ўтказди.
Томонлар APTLDʼга аъзолик Ўзбекистон учун бутунжаҳон тармоғини ривожлантиришни бошқариш бўйича глобал мулоқотда иштирок этиш, ахборот хавфсизлиги, кибержиноятчиликка қарши кураш, фойдаланувчилар ҳуқуқи ва миллий қонунчилик талаблари ўртасида мувозанат сақлаш, электрон ҳукумат ва онлайн-бизнесни ривожлантиришни рағбатлантиришда янги стратегик имкониятлар очишини таъкидлади.
Маълумот учун, APTLD (Asia Pacific Top Level Domain Association) нодавлат-нотижорат ташкилоти Яқин Шарқ, Осиё ва Океаниянинг 50 дан ортиқ, жумладан, CNNIC (.cn, Хитой), АUDА (.аu, Австралия), NIXI (.in, Ҳиндистон), VNNIC (.vn, Вьетнам), Интернет тармоғи миллий домени Мувофиқлаштирувчи маркази (.rf, Россия) каби интернет-рўйхатга олувчиларини қамраган.
Изоҳ (0)