«Касперский лабораторияси» Wi-Fi тармоғи хавфдан холи эмаслиги ҳақида огоҳлантирди

Wi-Fi тармоғи WPA2 хавфсизлик протоколи бузилгани сабабли фойдаланувчилар учун хавфдан холи эмас. Бу ҳақда «Касперский лабораторияси» компанияси эксперти Владимир Кусков маълум қилди, дея хабар беради  «РИА Новости».

«Чиндан ҳам WPA2 хавфсизлик протоколи бузиб кирилиши рўй берди, бу бутун дунёдаги фойдаланувчилар учун хавфли бўлиши мумкин. Хакерлар Wi-Fi тармоғига уланиши ва трафикни қўлга киритиши, яъни фойдаланувчилар тармоқда нима қилаётганини кўриши мумкин», — деди Кусков.

«Касперский лабораторияси» мутахассиси фойдаланувчиларга Wi-Fi қурилмалари ва шахсий қурилмалар (смартфонлар, ноутбуклар) дастурий таъминотини ўз вақтида янгилаш, ҳимоя воситалари ўрнатиш ва VPN-сервислардан фойдаланишни тавсия қилди.

Олдинроқ Бельгиядаги Лёвен католик университетининг хавфсизлик соҳасидаги эксперти Мэйти Ванхоф Wi-Fi учун фойдаланиладиган WPA2 хавфсизлик протоколида мавжуд заифликни аниқлаганди.

Экспертга кўра, ҳар қадай Wi-Fi қурилмалари хакерлар ҳужумига дуч келиши мумкин. Бу заифликни бартараф этса бўлади, бироқ паролни алмаштириш фойдаланувчини қутқармайди.