Тирбандликда қолиб кетган самолёт учувчиси йўловчиларни Альп тоғлари бўйлаб экскурсияга олиб чиқди

Swiss International Airlines авиакомпанияси учувчиси тирбандлик чоғида йўловчилар зерикиб қолмаслиги учун уларни Швейцариянинг Альп тоғлари бўйлаб «экскурсия»га олиб чиқди, деб ёзади «MK.ru».

Барселонадан Цюрихга йўл олган рейс Клотен халқаро аэропортига яқинлашганида тирбандликка тушиб қолди. Ўз навбатини кутиб, аэропорт осмонида  айланиб учиш ўрнига, ҳаво кемаси капитани йўловчиларга Альп тоғлари чўққиларини кўрсатишга қарор қилди.

Натижада йўловчилар Маттерхорн, Айгер, Мёнх, Юнгфрау тоғларини, шунингдек, Катта Алеч музлиги манзараларини томоша қилишга муваффақ бўлди.

Swiss International Airlines компанияси расмий вакили аниқлик киритишича, учувчи ҳеч қандай қоидани бузмаган — экипаж очиқ ва қуёшли ҳавода бундай экскурсияларни уюштиришга ҳақли. Яна бир шарти — парвоз дам олиш ёки байрам кунлари, яъни тоғлар осмони бўш бўлган пайтда амалга оширилиши керак.

Саёҳатчилар ижтимоий тармоқларда авиаташувчига бундай «эртакнамо» парвоз учун миннатдорлик билдирди ва самолёт бортидан олинган суратларни жойлади.