Соғлиқни сақлаш вазирлиги пойтахтда жойлашган республика ихтисослаштирилган илмий-амалий тиббиёт марказларининг мутахассисларини ҳудудларга икки йил ишлашга юборишини эълон қилди. Бу ҳақда «Правда Востока» хабар бермоқда.
Нашрга кўра, мазкур мутахассислар учун раҳбарлик лавозимлари таклиф этилмоқда.
Бу қандай асосда амалга оширилаётганига Соғлиқни сақлаш вазири ўринбосари Элмира Боситхонова тушунтириш берди:
— Вилоятлардаги тиббиёт муассасалари малакали кадрлар билан таъминланиши учун республика тиббиёт муассасаларида фаолият юритаётган мутахассислардан 136 нафари суҳбат асосида танлаб олинди. Улар вилоят тиббиёт масканларига раҳбар сифатида юборилади. Вазирлар Маҳкамасининг 2017 йил 13 августда бўлиб ўтган видеоселектор йиғилишида қабул қилинган баённомада уларнинг тўлиқ рўйхати тасдиқланган. Танланган ҳар бир мутахассис ҳудудларда раҳбар лавозимида ишлаш истагини билдирганини таъкидлаб ўтмоқчиман. Улар ўз хоҳишларига кўра юборилган.
Эслатиб ўтамиз, 18 октябрь куни Ўзбекистон Республикаси Президенти Шавкат Мирзиёев раислигида соғлиқни сақлаш тизимини янада такомиллаштиришга бағишланган навбатдаги йиғилиш бўлиб ўтди.
Изоҳ (0)