Олимлар салқин ҳароратдаги уйқунинг организмга ижобий таъсирини ва моддалар алмашинувини яхшилашини аниқладилар.
Организмда ёғларнинг икки тури мавжуд: оқ ва қорамтир. Оқ — бу калория захиралари. Қорамтир ёғлар эса иссиқлик генерациясини таъминлайди.
Қорамтир ёғ тўқималари янги туғилган чақалоқларда ривожланган бўлади. У чақалоқларга иссиқликни сақлашда ёрдам беради, лекин ёшимиз улғайиши билан биз бу тўқималарнинг катта қисмини йўқотамиз.
Қорамтир ёғлар калория захиралари сақланадиган оқ ёғлардан фарқли ўлароқ, калорияни сарфлашга ёрдам беради.
АҚШдаги Саломатлик Миллий институтининг тадқиқотчилари салқин хонада ухлаш ёрдамида организмдаги қорамтир ёғ миқдорини ошириш мумкинлигини аниқладилар.
Олимлар қуйидагича тажриба ўтказдилар: беш нафар соғлом қатнашчилар тўрт ой давомида ҳарорати назорат қилинадиган шароитда ухладилар. Улар истеъмол қилаётган калория миқдори ҳам ҳисобга олинди. Биринчи ой давомида ухлаш вақтида 24 °C мўътадил ҳарорат сақлаб турилди. Кейинги ойда уни 19 °C гача пасайтиришди, кейин яна мўътадил даражагача кўтаришди. Охирги ойда эса ҳароратни 27 °C гача кўтаришди.
Маълум бўлишича, салқин ҳарорат организмга сезиларли даражада таъсир кўрсатар экан. Бир ой давомида салқин хонада ухлашдан кейин организмдаги қорамтир ёғ захираси деярли икки баравар кўпайган. Бу эса ўз навбатида уларнинг инсулинга бўлган сезувчанлигини яхшилаган. Бу хусусият организмнинг глюкозани қанчалик яхши сингдиришини кўрсатади.
Шунингдек, бу ойда қатнашчилар кун давомида кўпроқ калория сарфлаганлар. Лекин улар яна юқори ҳароратда ухлай бошлашлари билан, ҳамма ўзгаришлар йўқолган. Қорамтир ёғ тўқималари таркиби тажрибадан олдинги ҳолатига қайтган.
Бу жуда ажойиб янгилик. Бундан келиб чиқадики, модда алмашишини қайта ҳаракатга келтириш учун салқин хонада ухлашнинг ўзи кифоя қилади.
Манба: «Лайфхакер»
Изоҳ (0)