Тошкент вилояти ИИБ томонидан ўтказилаётган профилактика тадбирлари доирасида жиноят содир этиб, суд ва тергов органларидан яшириниб юрган қидирувдаги шахслар ушланмоқда. Жорий йилнинг 5 октябрдан 12 октябрига қадар вилоят ҳудудида содир этилган 113 та жиноятдан 104 таси фош этилди. Қолган тўққизта ўғрилик жинояти айбдорларини қидириб топиш бўйича барча чоралар кўрилмоқда. Бу ҳақда ЎзА хабар берди.
Ҳафта давомида ўғрилик, қасддан одам ўлдириш, фирибгарлик, қонунга хилоф равишда хорижга чиқиш ёки Ўзбекистонга кириш каби жиноятларни содир этиб, қидирувда юрган 15 нафар шахс ушланган.
Жорий йилнинг 3 октябрь куни Чирчиқ шаҳрида ўтказилган тезкор тадбир давомида мазкур ҳудудда яшовчи 1988 йилда туғилган шахснинг уйи гумонланиб текширилганда 503,65 грамм «марихуана» гиёҳванд моддаси борлиги аниқланиб, ашёвий далил сифатида олинди. Ушбу ҳолат юзасидан Ўзбекистон Республикаси Жиноят Кодексининг тегишли моддалари билан жиноят иши қўзғатилган.
Чиноз туманида яшовчи 1969 йилда туғилган фуқаро Тошкент шаҳрида яшовчи танишининг ишончига кириб, Тошкент туманида жойлашган 12 сотих ерни «номингизга расмийлаштириб бераман», деб ундан 30 минг доллар олиб, шу кунга қадар қайтариб бермаган. Жабрланувчининг аризасига кўра, ушбу ҳолат юзасидан унга нисбатан ички ишлар органлари томонидан жиноят иши қўзғатилган.
Изоҳ (0)