Тошкент юридик коллежининг собиқ директори Наталья Темировага нисбатан жиноят иши қўзғатилди. Бу ҳақда Тошкент шаҳар ИИББда 12 октябрь куни бўлиб ўтган брифингда шаҳар прокуратураси бўлим бошлиғи Б.Деҳқонов маълум қилди.
Хабар беришларича, шаҳар прокуратураси томонидан Наталья Темирова ҳамда бошқа мансабдор шахсларга нисбатан Жиноят кодексининг 167-моддаси 2-қисми «г» банди билан жиноят иши қўзғатилган, тергов ҳаракатлари давом этмоқда.
167-модданинг 2-қисми «г» бандига кўра, айбдорга ишониб топширилган ёки унинг ихтиёрида бўлган ўзганинг мулкини ўзлаштириш ёки растрата қилиш йўли билан талон-торож қилиш мансаб мавқеини суиистеъмол қилиш йўли билан содир этилган бўлса — айбланувчи энг кам ойлик иш ҳақининг 100 бараваридан 300 бараваригача миқдорида жарима ёки 480 соатгача мажбурий жамоат ишлари ёки 2 йилгача ахлоқ тузатиш ишлари ёхуд 2 йилдан 5 йилгача озодликни чеклаш ёки 5 йилгача озодликдан маҳрум қилиш билан жазоланади.
6 октябрь куни эса мазкур коллеж ҳудудида жиноят содир бўлди. 3-курс талабалари ўртасида келишмовчилик келиб чиқиб, Саидкамрон Саидвоҳидов ўзининг икки курсдоши — Асадбек Парпибоев ва Раҳматилла Ёрқориевга пичоқ билан тан жароҳати етказган. Ҳодиса оқибатида Парпибоев вафот этган, Ёрқориевга тиббий ёрдам кўрсатилган.
7 октябрь куни эса коллеж директори Наталья Темирова ўз лавозимидан озод этилди. Уни лавозимидан озод этишга бағишланган йиғилишда Президент девони, Адлия вазирлиги, Олий ва ўрта махсус таълим вазирлиги масъул раҳбар ходимлари ҳам қатнашган.
Темирова хонимни истеъфога чиқариш арафасида коллеж ўқитувчиларининг мурожаати асосида ташкил этилган хизмат текшируви давомида у директор сифатида кадрларни ишга қабул қилишда қариндош-уруғчиликка, ходимларни ишга қабул қилишда таъмагирликка йўл қўйгани, битирувчиларга диплом беришда қонунчилик талаблари бузгани аниқланган, шунингдек, коллеж меҳнат жамоаси ўртасида гуруҳбозлик ва носоғлом муҳит шаклланган.
Сўнгги маълумотларга кўра, коллежга 7 октябрдан бери Восит Эргашев директорлик қилмоқда. У 1978 йил Самарқанд вилоятида таваллуд топган. Бунгача Тошкент юридик университетида проректор, кейинроқ кафедра мудири сифатида ишлаган.
Изоҳ (0)