Миробод туман жиноят ишлари бўйича судида Боровский номидаги тиббиёт коллежи ўқувчиси Жасур Иброҳимовнинг иши юзасидан яна икки гувоҳ — судланувчи Исломбек Тўлагановнинг отаси Абдужалил Расулов ҳамда жанжалга гувоҳ бўлган Темур Тўхтаевнинг кўрсатмаси тингланди, деб хабар берди «Новости Узбекистана».
Исломбек Тўлагановнинг отаси — Абдужалил Расулов судда марҳум Жасур Иброҳимовнинг оиласига ҳар томонлама ёрдам беришга ҳаракат қилганини сўзлади — дори-дармон олиб берган, шифокор қидирган, шахсий автомобилида диагностика учун хусусий клиникага олиб борган. Гувоҳ 4 май куни тахминан кечки соат 7 ларда 2-сонли шифохонага келганини таъкидлади, бироқ ўзини беморнинг бобоси дея таништирганини рад этди.
«Мен у ерга ўғлим қўнғироқ қилиб Жасур билан урушганини ва у ҳозир шифохонада эканлигини айтгани сабаб етиб бордим. Биз Исломбек билан Жасурнинг палатасига кирдик. Кейин мен ўзимнинг таниш шифокорим — Бахтиёр Жонтуллаевичга қўнғироқ қилдим, у ҳарбий госпиталда жарроҳ бўлиб ишлайди. Шундан сўнг мен Жасурни шахсий машинамда МСКТга олиб бордим ва муолажа ҳақини тўладим. Ўша кечанинг ўзида танишим бўлган Бахтиёр болани келиб кўрди ва операция ўтказишни маслаҳат берди», — дея аниқлик киритди судланувчининг отаси.
Шу билан бирга, Жасур Иброҳимовни кўргани келган шифокор касаллик тарихи дафтарига ҳеч қандай қайд қолдирмаган. У оғзаки равишда маслаҳат берган. Шунингдек, Абдужалил Расуловнинг таъкидлашича, унинг Жасурбекни даволаниши учун кўрсатган ёрдами 3 миллион сўмни ташкил этган. Марҳумнинг онаси судланувчининг оиласи молиявий жиҳатдан ёрдам кўрсатганини рад этмади, бироқ адвокат билан қилинган ҳисоб-китобларига кўра, умумий сумма Расулов айтганидан анча кам чиққан.
Судланувчининг отаси, шунингдек, ўғли нима сабабдан июнь ойининг бошида Туркияга борганига ойдинлик киритди. Унинг сўзларига кўра, Исломбек — энди иш бошлаётган тадбиркор ва Туркияга сафари ҳам айнан бизнесига боғлиқ бўлган. Бундан ташқари, у турк олий ўқув юртларидан бирига ҳужжат топширишни ҳам режалаштирган. Бироқ унга чақирув қоғози келган ва Исломбек дарҳол Ўзбекистонга қайтган.
Шу куннинг ўзида судда яна бир гувоҳ, ўша вақтда Боровский номидаги коллежнинг 3-курсида ўқиган, ҳозирда битирувчи — Темур Тўхтаев ҳам кўрсатма берди. Темур ҳам воқеага гувоҳ бўлган бошқалар каби деярли бир хил кўрсатма берди. Судья Матчоновнинг анъанавий тарзда «марҳумнинг ҳам, айбланувчининг ҳам дўсти бўлмасангиз нега 145-мактаб олдига бордингиз», дея берган саволига Тўхтаев «можаронинг олдини олиш учун», деб жавоб қайтарди.
Шунингдек, судга нега воқеа иштирокчиларининг барчаси дарсда ўтирмасдан тасодифан кўришиб қолишгани ғалати туюлди. Тўхтаевнинг айтишича, бу шунчаки тасодиф. Суднинг саволларига жавоб берган гувоҳнинг кўрсатмалари қисман чалкашиб кетди. Темур Тўхтаев Ислом ва Жасур ўртасидаги олишув айнан қай тарзда ўтганини, можародан сўнг Жасурни ким таксига ўтқазганини ва бўлиб ўтган воқеадан кейин унинг аҳволи қандай эканлигини билиш мақсадида ким қўнғироқ қилганини аниқ айта олмади. Гувоҳнинг охирида айтишича, марҳумнинг кўриниши яхши бўлган ва ўзини яхши ҳис қилган, ҳеч нимадан шикояти бўлмаган.
Изоҳ (0)