Тошкент вилояти божхона бошқармаси «Ғишткўприк» чегара-божхона комплекси ходимлари қоракўл териларини ноқонуний равишда олиб чиқишга уринган шахслар фаолиятига чек қўйди. Бу ҳақда божхона бошқармаси ахборот хизмати хабар бермоқда.
Қўшни давлатга йўл олган пойтахтлик А.Зиямуҳаммедов божхона назоратидан ўтиш давомида ёнида ортиқча буюмлар йўқлигини маълум қилади. Аммо, унга тегишли юклар назорат-рентген аппаратидан ўтказилганда божхона ходимларида шубҳа туғилган.
Шундан сўнг ушбу юклар холислар иштирокида кўздан кечирилганида, ушбу шахс йўловчи божхона декларациясида ҳам, божхона ходимларининг оғзаки сўрови пайтида ҳам маълум қилмасдан туриб, 20 дона қоракўл териларини яширин равишда олиб чиқишга урингани аниқланган.
Шунингдек, айни шу куни пойтахтлик яна бир шахс Т.Мажидовнинг ҳам худди шундай уринишига чек қўйилди. Ушбу шахс ҳам божхона назоратидан четлаб ўтиб, 25 дона қоракўл териларини олиб чиқиб кетмоқчи бўлган пайтда тўхтатиб қолинган.
Олий навли ушбу қоракўл териларининг умумий баҳоси дастлабки ҳисоб-китобларга кўра 13,5 миллион сўмни ташкил қилади.
Ҳозирда мазкур ҳолатлар юзасидан божхона текширувлари ва суриштирув жараёнлари давом эттирилмоқда.
Изоҳ (0)