Рақобат қўмитаси Янгийўл ва Чирчиқдаги фаолият кўрсатмаётган объектларни хатловдан ўтказди 

Давлат рақобат қўмитаси томонидан ўтказилган хатловлар Янгийўл туманида аввал хусусийлаштирилган, бироқ бугунги кунда бўш турган 23 та объект мавжудлигини кўрсатмоқда. Бу ҳақда қўмита матбуот хизмати маълум қилди.

Мазкур объектларнинг жами қурилиш майдони 50,0 минг квадрат метрни, эгаллаган ер майдонлари эса 20,6 гектарни ташкил этади.

Ҳозирда туман ҳудудидаги мазкур 23 та объект негизида мулкдорлар томонидан янги ишлаб чиқариш ва хизмат кўрсатиш объектларини ишга тушириш бўйича лойиҳаларни амалга ошириш таклифи берилган.

Қўмита ўтказган хатловлар Чирчиқ шаҳри ҳудудида ҳам аввал хусусийлаштирилган ва ҳозирда бўш турган 70 та объект мавжудлигини кўрсатди. Мазкур объектларнинг жами қурилиш майдони 235,0 минг квадрат метр, эгаллаган ер майдонлари 50,0 гектарни ташкил этади. Улар қаторида собиқ пояфзал ва парранда фабрикалари ҳам бор.

Чирчиқ шаҳридаги бўш объектлардан 34 таси негизида янги ишлаб чиқариш ва хизмат кўрсатиш объектларини ишга тушириш бўйича лойиҳаларни амалга ошириш таклифи берилди.

Қўмитанинг эслатишича, жойларда идоралараро комиссиялар ташкил этилган бўлиб, ушбу комиссияларга аввал хусусийлаштирилган корхона ва объектларнинг қайтадан тўла қувватда, самарали ишлашини таъминлаш вазифаси юклатилган. Тадбиркорларнинг инвестиция лойиҳаларини амалга оширишида амалий ёрдам бериш бўйича кўплаб ваколатлар берилган.