Сурхондарё вилояти Термиз шаҳрида қимор ўйинларига муккасидан кетган шахс ўзи қарздор бўлган аёлни пичоқлаб ўлдирди. Бу ҳақда “Ҳудуд” информацион дастурида хабар қилинди.
Қайд этилишича, сурхондарёлик 29 ёшли фуқаро қимор ўйинларига ружу қўйиши оқибатида ўз танишларидан маълум миқдорда қарздор бўлиб қолади ва бу қарзларни сўндириш учун судхўрлик билан шуғулланиб келган аёл билан танишади.
Ушбу шахс аёлдан 2021-2024 йилларнинг турли вақтларида, жами 20 миллион сўмга яқин пулларни ойига 10 фоизлик устама билан қарзга олган. Аммо у қарзларни ўз вақтида қайтара олмаган, фоизлар эса ўсиб борган.
Шундан сўнг аёл фуқарога унинг устидан ҳуқуқни муҳофаза қилувчи органларга мурожаат қилишини айтади. Эркак эса олган қарзларидан қутулиш учун аёлни ўлдиришни мақсад қилади.
Жорий йилнинг 1 март кунидан 2 март кунига ўтар кечаси соат 03:30 лар атрофида қарздор фуқаро аёлга қўнғироқ қилиб, қарзларини олиб келганини айтади. Фуқаро қарз берувчи билан кўришгач, уни танишининг Lacetti русумли автомашинасига мажбурлаб ўтқизиб, овлоқ жойга олиб борган. Аёлдан озининг пластик картасига 24 миллион сўм миқдорида пулларни ўтказиб олиб, сўнгра уни пичоқлаб ўлдирган.
Ушбу жиноят иши Термиз туман судида кўриб чиқилиб, айбланувчига 18,5 йилга озодликдан маҳрум этиш жазоси тайинланди.
Изоҳ (0)