4—9 октябрь кунлари Ўзбекистон Республикаси Бандлик ва меҳнат муносабатлари вазирининг биринчи ўринбосари Э.Муҳитдинов ва Ташқи меҳнат миграцияси масалалари агентлиги раҳбари Х.Асомов бошчилигидаги Ўзбекистон Республикаси делегацияси Россия Федерациясида бўлиб қайтди. Бу ҳақда Ташқи меҳнат миграцияси масалалари агентлиги ахборот хизмати хабар бермоқда.
4 октябрда Бандлик ва меҳнат муносабатлари вазирлиги ҳамда Агентлик делегацияси бир гуруҳ компаниялар ва текстил саноати соҳасида Москва вилояти ҳудудида фаолият юритувчи москвалик иш берувчилар томонидан молиялаштирилган бир қатор тижорий меҳмон уйлари (ётоқхоналар)ни кўздан кечирди. Ушбу ётоқхоналарда агентлик томонидан қонуний равишда ишга юборилган Ўзбекистон фуқаролари ҳам истиқомат қилади.
Ташқи меҳнат миграцияси масалалари агентлиги томонидан россиялик бир қатор иш берувчилар билан Россия Федерациясига меҳнат фаолиятини амалга ошириш учун Ўзбекистон Республикаси фуқароларини ташкилий жалб этиш тўғрисида Битимлар имзоланган эди. Ушбу ташрифдан кўзланган мақсад Россия Федерациясига Агентлик томонидан юборилган Ўзбекистон фуқаролари учун яратилган шарт-шароитларни ўрганишдан иборат.
Меҳмон уйларига ташриф чоғида Ўзбекистон Республикаси Бандлик ва меҳнат муносабатлари вазирининг биринчи ўринбосари Э.Муҳитдинов ва агентлик раҳбари Х.Асомов ишчиларнинг яшаш, овқатланиш шароитлари, Ўзбекистон Республикаси фуқароларининг меҳнат фаолиятини амалга оширишлари учун тегишли ҳужжатлар (патент)ни олгунга қадар мослашиш муддатларини белгилаш масалалари билан танишди. Делегация томонидан меҳнат мигрантлари ҳуқуқларини ҳимоялаш ва фуқароларнинг Россияда қонуний ишга жойлашишини такомиллаштириш тартиби тўғрисида қонунчиликка киритилаётган ўзгартиришлар ҳақида суҳбат уюштирилди.
Изоҳ (0)