Ўзбекистон ташқи ишлар вазирлиги Россиянинг Приморье ўлкасида рўй берган, икки нафар ўзбекистонликнинг ҳалокатига сабаб бўлган ЙТҲ юзасидан баёнот берди. Баёнот матни ТИВ расмий сайтида келтирилди.
«ОАВ маълумотларига кўра, 2017 йил 12 октябрь куни Владивосток шаҳрида автоҳалокат натижасида икки Ўзбекистон фуқароси ҳалок бўлган», — дейилади баёнотда.
Айтилишича, Ўзбекистоннинг Новосибирск шаҳридаги бош консуллиги батафсил маълумот учун Приморье ўлкасининг тегишли тузилмалари билан алоқаларни ўрнатган ва ушбу масалани назорат остида олган.
Илгари хабар қилинганидек, Владивосток шаҳридаги «Седанка» дам олиш маркази яқинида шаҳар ташқарисига қараб ҳаракатланаётган Toyota Fielder автомобили ҳайдовчиси бошқарувни йўқотиб, ён томони билан бетон устунга бориб урилган. Зарба кучлилигидан машина устун атрофига «ўралиб қолган».
Тўқнашув натижасида икки киши — ҳайдовчи ва олд ўриндиқдаги йўловчи ҳалок бўлган. Орқа ўриндиқда ўтирган учинчи киши касалхонага ётқизилди, унинг аҳволи оғир деб баҳоланмоқда.
Ҳалок бўлганларнинг иккиси ҳам Ўзбекистон фуқароларидир.