«Ўзбекистон» нашриёт-матбаа ижодий уйида инновацион технологиялар асосида 3D форматли китоблар чоп этила бошланди. Бу лойиҳа Ўзбекистон Матбуот ва ахборот агентлигининг Ғафур Ғулом номидаги нашриёт-матбаа ижодий уйи ва «Colar Technology» масъулияти чекланган жамияти томонидан амалга оширилган бўлиб, мамлакат ноширлик соҳаси учун янгилик ҳисобланади. Бу ҳақда ЎзА хабар берди.
Матбуот ва ахборот агентлигининг маълумотларига кўра, бугунги кунда Ўзбекистонда 130 дан ортиқ нашриёт, 1800 га яқин матбаа корхонаси давлат рўйхатидан ўтказилган бўлиб, улар томонидан йилига тўрт минг номдан зиёд, умумий адади 50 миллион нусхадан ортиқ китоб маҳсулотлари нашр этилмоқда.
Адабиётга салмоқли ҳисса қўшган адибларнинг, айниқса, ёш қаламкашларнинг асарларини чоп этиш ишлари ҳам доимий эътиборда. Масалан, Ёзувчилар уюшмасининг «Ижод» фонди томонидан 2010 йилдан буён «Биринчи китобим» сериясида ёш ижодкорларнинг 1 миллион 220 минг нусхада китоби чоп этилган.
Ўзбекистон Матбуот ва ахборот агентлиги, «Шарқ» нашриёт-матбаа акциядорлик компанияси, «Ўзбекистон почтаси» акциядорлик жамияти, етакчи нашриётлар томонидан аҳолининг китоб маҳсулотларига бўлган эҳтиёжини қондиришда яна бир қулайлик яратилди. Китоб маҳсулотларини нашриётлардан ҳудудларга арзон нархларда етказиш, онлайн буюртма бериш ва уларни почта орқали китобхонларга етказиб бериш бўйича махсус тизим ишлаб чиқилди ва у тез кунда ишга туширилади.
Жорий йилнинг ноябрь ойида ўтказиладиган «Infolib Uzbekistan» миллий ахборот-кутубхона ҳафталиги доирасида турли мавзуларда онлайн конференциялар ташкил этиш орқали аҳоли, айниқса, ёш авлоднинг кутубхона хизматларидан фойдаланиш кўникмаларини шакллантириш кўзда тутилган.
Хабарда айтилишича, Матбуот ва ахборот агентлиги томонидан бугунги бунёдкорлик ишларини тарих зарварақларига муҳрлаш, ёзувчи ва шоирлар, журналистлар, хусусан, ёш ижодкорларни маънавий ва моддий жиҳатдан қўллаб-қувватлаш мақсадида «Тараққиёт стратегияси ва замонамиз қаҳрамони» мавзуида бадиий ва ижтимоий-сиёсий асарлар яратиш бўйича ижтимоий буюртмалар лойиҳаси эълон қилинди. Айни кунларда лойиҳага келиб тушаётган бадиий ва ижтимоий-сиёсий асарлар салмоғи ошиб бормоқда. Улар агентлик тизимидаги нашриётлар қошида тузилган нуфузли ҳайъатлар томонидан баҳоланиб, нашриётларнинг ижтимоий грантлари асосида чоп этилади ва муаллифларга белгиланган тартибда қалам ҳақи берилади. Нашриётлар ва муаллифлар ўртасида тузиладиган шартномада ижтимоий грантлар асосида яратиладиган китоб учун қалам ҳақининг маълум қисмини олдиндан тўлаш ҳам белгиланган.
Шунингдек, Матбуот ва ахборот агентлиги томонидан нашриётларнинг ўзаро ҳамкорлигини кенгайтириш, ноширлик маданияти ва нашриётларнинг ижодий салоҳиятини юксалтириш, соҳада эришилган ютуқларни кенг оммалаштириш, ноширлар, муҳаррирлар ва техник муҳаррирлар, мусаҳҳиҳ, рассом-дизайнерлар, матбаачиларни рағбатлантириш, аҳолининг барча қатлами, хусусан, ёшлар орасида китобхонлик маданиятини кенг тарғиб қилиш мақсадида «Йилнинг энг яхши китоби» ва «Ёшларнинг энг севимли китоби» каби кўрик-танловларни ўтказиш режалаштирилган. Мазкур танловларда мулкчилик шаклидан қатъи назар барча нашриёт ва матбаа корхоналари иштирок этиши мумкин.
Изоҳ (0)