Россия чегаралари яқинида Американинг бутун бошли дивизияси пайдо бўлди. Бу ҳақда Мудофаа вазирлигининг расмий вакили генерал-майор Игорь Конашенков маълум қилди, деб хабар берди «РИА Новости».
Унинг сўзларига кўра, Россия—Беларусь қўшинлари иштирокида «Ғарб—2017» ўқув машғулоти Европа ОАВлари томонидан мисли кўрилмаган ваҳимада ёритиб борилди. Улар ўқув машғулотларининг «шаффоф эмаслиги», қуролли кучларнинг «гибрид» операциялари, «ҳужум қилиш» буйруғини олган ҳарбий «орда»лар, шунингдек, Россия ўзининг «зарба берувчи гуруҳини» Беларусда қолдиргани ҳақида бонг урди.
Мудофаа вазирлигининг таъкидлашича, ўзининг Россияга қаршилиги билан Бўлтиқбўйи давлатлари ҳамда Польша «ажралиб» турган. Конашенковнинг сўзларига кўра, Польша Мудофаа вазирлиги раҳбари Антоний Мацеревич «ташқи хавфлардан ҳимояланиш учун» мамлакатга бир нечта Америка дивизияларини жойлаштириш кераклилигини маълум қилишга ҳам улгуриб бўлган.
«Ғарб—2017» ўқув машғулотларининг фонида Болтиқбўйи мамлакатлари ҳамда Польшада «Атлантик қатъият» операцияси режасига мувофиқ АҚШ Қуролли Кучларининг 3-зирҳли танклар бригадасини жойлаштириш ишлари бўлиб ўтди. Ушбу бригаданинг барча техникалари (87 та M1А1 Abrams танклари, M109 Paladin оғир ўзиюрар гаубицалар, 133 «БМП» Bradley ва бир неча юз дона машина) қолиши керак эди. 3-зирҳли танк бригадасининг шахсий таркибини эса 1997 йилда Россия билан ўзаро имзолаган «НАТО—РФ асосий акти»ни бузмаслик учун АҚШ Қуролли Кучларининг 2-зирҳли танк бригадаси ҳарбий хизматчилари алмаштириши керак эди», — деди Конашенков.
Унинг қўшимча қилишича, Россиянинг «Ғарб—2017» машғулотидан тўғри ҳарбий ҳаракатларни бошлаши мумкинлиги ваҳимаси фонида Польшага АҚШнинг 2-зирҳли танк бригадаси «секингина» кириб келиб, жойлашиб олган.
Шу билан бирга Польша ва Болтиқбўйи республикаларида қолдирилган Американинг 3-зирҳли танк бригадасининг ҳарбий техникаси ҳам ҳеч қаерга кетмаган.
Генерал-майорнинг сўзларига қараганда, «Ғарб—2017»дан келиши мумкин бўлган «рус хавфи» — Пентагоннинг ушбу операцияни ахборотлар пардаси ортига яширган фирибгарона ҳаракати. «Хўш, ким тажовуз тайёрламоқда?», — деди Конашенков.
Изоҳ (0)