Канадалик таниқли хонанда Майкл Бубле сентябрь ойи охирида Тошкентдаги Форумлар саройида концерт берди. Бироқ бу концерт ҳақида кенг жамоатчилик концерт ўтиб бўлганидан сўнг хабар топди.
Концертдан фото ва видеолавҳалар Facebook фойдаланувчилари томонидан эълон қилинган. Улар Майкл Бубленинг қўшиқларидан ҳузурлангани, концерт дастури жуда ажойиб ўтгани ҳақида тўлқинланиб ёзган.
Концерт ҳақида у ўтиб бўлганидан сўнг хабар берганлар орасида MyDay нашрининг Facebook саҳифаси ҳам бор. Тегишли пост Майкл Бубленинг ўзбекистонлик мухлислари томонидан қолдирилган эътирозли комментларга тўла.
«Маҳаллий ‘юлдузчаларимиз’ ўз концертлари рекламаси билан бир неча ойлаб кўзимизни қийнайди, наҳотки Бубленинг ташрифи ҳақида олдиндан, тузукроқ хабар беришнинг иложи бўлмаган бўлса?», — деб ёзади фойдаланувчилардан бири.
«Дарҳақиқат, концертда бўлганлар, Бубленинг концерти бўлишини қаердан билиб қолдинглар? Жаҳон миқёсидаги юлдуз шаҳарда концерт берармиш-у, лекин бу ҳақда ҳеч ким билмасмиш», — дейди яна бир норози мухлис.
Бир қатор фойдаланувчилар концертда мазза қилгани, у зўр ўтганини такрор ва такрор ёзган, ташкилотчиларга миннатдорчилик билдирган, бироқ бошқа фойдаланувчиларнинг «Бу концерт бўлишини қаердан, қандай билдингиз?», қабилидаги саволларини жавобсиз қолдирган.
«Мана ахборот олиш эркинлиги-ю, мана фуқароларнинг ўзаро тенглиги! Фақат танланган шахсларгина мега-юлдузнинг концертидан бохабар қилинган! Тахминимча, залда бўлган томошабинларнинг 80 фоизи айнан қандай хонанданинг концертига келганини англаб етмаган ҳам бўлса керак», — деб ёзади фойдаланувчилардан бири. «Фақат элита учун ўтказилдими?», — деб уни қувватлаган бошқа бир мухлис.
Қайд этиш жоиз, сентябрь ойи охирида Тошкентда яна бир эътиборга молик воқеа юз берган — россиялик миллиардер Алишер Усмоновнинг жияни Сарварнинг никоҳ тўйи бўлиб ўтган эди. Дастлаб мазкур тўйда Филипп Киркоров, Вера Брежнева, Иван Ургант каби россиялик юлдузлар хизматда бўлгани ҳақида хабар берилган эди.
Мавзуга доир: Алишер Усмонов қариндошларининг Тошкентда ўтган тўйида Филипп Киркоров ва Иван Ургант хизматда бўлди (фото ва видео)
42 ёшли Майкл Бубле анъанавий эстрада йўналишида куйловчи крунер-хонанда. У турли йилларда бир неча бор нуфузли Grammy ва Juno мукофотларини қўлга киритган, қўшиқлари Австралиядан тортиб Ливангача хит-парадларда етакчилик қилган. Альбомлари 30 миллиондан зиёд нусхада сотилган.
Изоҳ (0)