Россияда 2016/2017-ўқув йили давомида жисмоний тарбия дарсларида 211 нафар ўқувчи ҳалок бўлди. Бу ҳақда, Meduza’нинг хабар беришича, Россия фан ва таълим вазири Олга Василева маълум қилган.
«Бизда мактабга қатнаётган болаларнинг саломатлиги аҳволи ҳақида маълумотлар йўқ», — деди вазир. Унинг қайд этишича, авваллари мактабларда саломатлик гуруҳлари бўлган ва жисмоний тарбия дарсларида ўқувчиларга буюриладиган юкламалар белгиланганидан ошиб кетиши мумкин эмас эди.
Василеванинг сўзларига кўра, вазирлик шифокорлар билан улар ўқувчиларни у ёки «саломатлик гуруҳи»га бириктириб қўйиши борасида келишиб олган.
Бироқ, вазирнинг қайд этишича, шунинг ўзи етарли эмас. Унинг фикрича, ўқитувчи қандай ташхисли бола билан ишлаётганини билиши керак. Масалан, Василеванинг айтишича, педагог эпилепсия ҳолатида нима қилишни билиши керак.
«Шахсий маълумотларнинг ҳимояси мана нималарга олиб келди — бизда тиббий карталар йўқ, биз бола нималар билан касалланганини билмаймиз», — деди Россия фан ва таълим вазири.
Амалдаги қоидаларга кўра, Россия мактабларида ҳафтасига уч марта жисмоний тарбия дарслари ўтилади.
2016 йил августида таълим вазири Олга Василева учинчи жисмоний тарбия дарси ўрнига спорт рақси ёки ритмика машғулотларини ўтказишни таклиф қилган эди.
Изоҳ (0)