Тўрақўрғонда умумий қиймати 13 млрд 500 млн сўм бўлган Исҳоқхон Ибрат мажмуаси лойиҳасининг асосий қисми бажарилди
Наманган вилояти Тўрақўрғон туманида Ўзбекистон Республикаси Вазирлар Маҳкамасининг 2017 йил 13 апрелдаги «Наманган вилояти Тўрақўрғон туманида атоқли маърифатпарвар Исҳоқхон Ибрат номидаги ёдгорлик мажмуасини ташкил этиш тўғрисида»ги қарори асосида кенг кўламли бунёдкорлик ишлари амалга оширилмоқда, деб хабар берди ЎзА.
Бугун Ўзбекистон Президенти Шавкат Мирзиёев ташаббуси билан Тўрақўрғон тумани марказида Исҳоқхон Ибрат хотирасини абадийлаштириш мақсадида мемориал мажмуа барпо этилмоқда.
Хотира мажмуаси Косонсой сойининг чап соҳилида 2 гектардан зиёд майдонни эгаллайди. Умумий лойиҳа қиймати 13 миллиард 500 миллион сўм бўлган мажмуа боғ-хиёбон Исҳоқхон Ибратнинг ҳайкали, миллий меъморлик услубидаги айвон, чет тилларга ихтисослаштирилган 400 ўринли мактаб-интернат, ҳудуддаги Ғойибназар қози мадрасаси меъморий ёдгорлиги асосида халқ амалий санъати ва бадиий ҳунармандлик маркази, Ибрат номидаги замонавий босмахона, 140 ўринли мактабгача таълим муассасаси ва бошқа бадиий композицияли элементларни ўз ичига олади.
Айни пайтда лойиҳада кўзда тутилган ишларнинг асосий қисми бажарилди. Жумладан, мактаб-интернат биносининг асосий корпуси қуриб битказилди, ташқи ва ички пардозлаш ишлари олиб борилмоқда. Спорт зали қурилиши бошлаб юборилди. Мажмуа таркибидаги Ғойибназар қози мадрасасида реставрация ишлари ҳам ниҳоясига етказилмоқда. Хиёбоннинг ўнг тарафидан ўтган сойнинг икки соҳили реконструкция қилинмоқда, келгусида мазкур соҳил одамлар сайр қиладиган, мазмунли ҳордиқ чиқарадиган масканга айланади.Достонбек Баҳодиржон ўғли, Тўрақўрғон тумани бош архитектори
Туман бош архитекторининг сўзларига кўра, яқин кунларда чет тилларга ихтисослашган мактаб-интернат ўқувчилари учун ётоқхона қурилиши ҳам бошланади. Айни пайтда мазкур иншоот учун ажратилган майдонда тупроқ ишлари бажарилмоқда.
Исҳоқхон тўра Ибрат 1862 йилда Тўрақўрғон яқинидаги Сайрам қишлоғида туғилган. Араб, форс, рус, ҳинд, урду, инглиз ва француз тилларини яхши билган, энг қадимий финикия, яҳудий, сурия, юнон ёзувларини ўрганган. Серқирра ижодкор сифатида «Луғати ситта ал-сина» («Олти тилли луғат»), «Жомеъ ул-хутут» («Хатлар мажмуи»), «Тарихи Фарғона», «Тарихи маданият», «Мезон уз-замон» («Замон тарозуси»), «Санъати Ибрат, қалами Мирражаб Бандий» каби ўндан ортиқ илмий-тарихий ва маърифий асарлар яратган. Ибрат домла 1886 йилдаёқ эски мактабга нисбатан бирмунча илғор бўлган мактаб очган. 1907 йилда эса янги «усули савтия» мактаби ташкил этиб, қишлоқ болаларини ўқитган.
