Тошкент шаҳри Чилонзор туманида жойлашган коллежларнинг бирида таҳсил оладиган Анвар таниши Гулига телеграм мессенжери орқали ўзаро суҳбати давомида ўзида гиёҳвандлик моддаси борлигини айтиб, уни тайёрлаш жараёнларини ҳам яхши билишини, хоҳласа унга ҳам ўргатишини айтади, деб ёзади «Ўзбекистон 24».
Эртаси куни оқ қоғозга ўралган кичик ҳажмда келтирилган ушбу гиёҳвандлик моддасини Гулига коллеж ҳудудига олиб келиб беради.Ўқув масканида фаолият олиб бораётган Ёшлар иттифоқи етакчиси Гулининг ўзини тутиши ва хатти-ҳаракатларида ўзгаришлар борлигини сезиб, кўпдан бери уни назоратга олган эди. Шубҳали ҳолат ҳақида Чилонзор тумани ИИБ Ҳуқуқбузарликлар профилактикаси бўлими ходимларига мурожат қилиб хабар беради. Аниқлик киритиш мақсадида инспектор коллежга бориб, Гули билан суҳбатлашади. Буюмлари гувоҳлар иштирокида текширилганда Гули ўзи билан гиёҳвандлик моддасини олиб юрганлиги маълум бўлади. Ушбу модда тегишли тартибда расмийлаштирилиб олинади.
Дастлабки суриштирув ишларида Гули ушбу моддани Анвардан олганлигини айтади. Анвар ҳам тергов ишларига жалб қилинади. Ҳозирги кунда дастлабки тергов ҳаракатлари олиб борилмоқда.
Шунингдек, Олмазор туманида жойлашган «Шифобахш сувлар» блок постида хизмат олиб бораётган йўл патруль хизмати ходимлари томонидан Тошкент шаҳри худудига кириб келаётган Spark автамобили тўхтатилиб белгиланган тартибда текширилади. Йўловчи сифатида кетаётган коллеж ўқувчисининг буюмлари текширилганда, махсус идишдаги суюқлик уларнинг эътиборини тортади. Ушбу суюқлик гувоҳлар иштирокида расмийлаштирилиб олинади. Экспертиза хулосасига кўра, ушбу суюқлик таркибида канабис мойи борлиги аниқланди. Ҳозирда ҳар икки ҳолат юзасидан тергов ҳаракатлари олиб борилмоқда.
Изоҳ (0)