23-Тошкент халқаро сайёҳлик ярмаркаси арафасида 29 сентябрь куни бўлиб ўтган матбуот анжуманида туризм соҳасини ривожлантириш масалалари муҳокама қилинди, деб ёзади «Nuz.uz».
Кўп йиллардан буён Ўзбекистонда сайёҳлик автобусларининг кечки вақтларда ҳаракатланиши тақиқлаб қўйилган, дейилади хабарда. Бу йўловчи автобуслари иштирокида ўлимга олиб келувчи йирик йўл-транспорт ҳодисалари юз бергани сабабли амалга оширилган. Бу одамлар ҳалокати рискини камайтирди, аммо статистика кўпроқ сондаги кишилар енгил автотранспорт иштирокидаги ЙТҲларда ҳалок бўлаётганини кўрсатмоқда.
Таъкидланишича, тақиқ туфайли ички ва тоғ туризми, экстремал ва экотуризм имкониятлари пасайди. Шунингдек, республиканинг тоғли туманлари аҳолиси туман ёки вилоят марказларига етиб олишда қийинчиликларга дуч кела бошлади.
Туризмни ривожлантириш давлат қўмитаси раиси Азиз Абдуҳакимов «Nuz.uz» мухбирининг ушбу масалаларни ҳал қилиш йўллари ҳақидаги саволига жавоб берар экан, бундай муаммо ҳақиқатда мавжудлигини ва у тегишли муассасалар билан муҳокама қилиш босқичида турганлигини айтди. Масалалар йўл қопламасини яхшилаш, ёритиш, ҳайдовчиларнинг касбий тайёргарлиги ва бошқаларга тааллуқли.
Шу билан бирга, у муҳокама ушбу муаммони ижобий ҳал қилиш томонга қараб бораётганини, бу эса сайёҳлик тармоғи имкониятларини анча кенгайтириб, унинг рақобатбардошлилигини оширишини таъкидлади.
Изоҳ (0)