23-Toshkent xalqaro sayyohlik yarmarkasi arafasida 29-sentabr kuni bo‘lib o‘tgan matbuot anjumanida turizm sohasini rivojlantirish masalalari muhokama qilindi, deb yozadi “Nuz.uz”.
Ko‘p yillardan buyon O‘zbekistonda sayyohlik avtobuslarining kechki vaqtlarda harakatlanishi taqiqlab qo‘yilgan, deyiladi xabarda. Bu yo‘lovchi avtobuslari ishtirokida o‘limga olib keluvchi yirik yo‘l-transport hodisalari yuz bergani sababli amalga oshirilgan. Bu odamlar halokati riskini kamaytirdi, ammo statistika ko‘proq sondagi kishilar yengil avtotransport ishtirokidagi YTHlarda halok bo‘layotganini ko‘rsatmoqda.
Ta’kidlanishicha, taqiq tufayli ichki va tog‘ turizmi, ekstremal va ekoturizm imkoniyatlari pasaydi. Shuningdek, respublikaning tog‘li tumanlari aholisi tuman yoki viloyat markazlariga yetib olishda qiyinchiliklarga duch kela boshladi.
Turizmni rivojlantirish davlat qo‘mitasi raisi Aziz Abduhakimov “Nuz.uz” muxbirining ushbu masalalarni hal qilish yo‘llari haqidagi savoliga javob berar ekan, bunday muammo haqiqatda mavjudligini va u tegishli muassasalar bilan muhokama qilish bosqichida turganligini aytdi. Masalalar yo‘l qoplamasini yaxshilash, yoritish, haydovchilarning kasbiy tayyorgarligi va boshqalarga taalluqli.
Shu bilan birga, u muhokama ushbu muammoni ijobiy hal qilish tomonga qarab borayotganini, bu esa sayyohlik tarmog‘i imkoniyatlarini ancha kengaytirib, uning raqobatbardoshliligini oshirishini ta’kidladi.
Izoh (0)