Air France авиакомпаниясининг Париждан Лос-Анжелесга учаётган A380 самолёти двигателларидан бирининг қопламаси узилиб тушди. Бу ҳақда TJournal хабар берди.
Йўловчиларнинг айтишича, самолёт Гренландия осмонида бўлган вақтда улар баланд овоздаги товушни эшитган ва кейин салонда кучли тебранишни сезган.
Йўловчиларнинг фикрича, самолёт двигателига қуш кириб кетган бўлиши мумкин. Бундай фикр расман тасдиқланмаган.
A380 экипажи йўналишни ўзгартирган ва Канададаги Гуз-Бей аэропортига қўнган. Бу аэропорт Канада ҳарбий-ҳаво кучларига тегишли, бироқ ундан Атлантика устидан парвоз қилаётган самолётларнинг фавқулодда қўнишида фойдаланилади.
A380 нинг бортида 496 нафар йўловчи ва 24 нафар экипаж аъзоси бўлган. Ҳодиса натижасида улардан ҳеч бири жабрланмаган.
Изоҳ (0)