Канаданинг Эдмонтон шаҳрида эркак киши қасддан автомобилни бир гуруҳ пиёдалар устига ҳайдаб борган ва полиция офицерига пичоқ билан ҳужум қилган. Ҳодиса теракт сифатида баҳоланмоқда. Бу ҳақда CBC News телеканалига таяниб, «Газета.ru» хабар берди.
Ҳодиса оқибатида беш киши жабрланган. Таъкидланишича, ҳужумга учраган полициячи жиддий жароҳат олмаган. Бошқа жабрланганларнинг аҳволи ҳақида хабар берилмаган.
Полициянинг маълум қилишича, ҳужум қилган эркак якка ўзи ҳаракат қилган. Полиция текшириш жараёнида ҳодисага бошқа шахсларнинг ҳам алоқадорлигини ўрганишни кўзламоқда.
Таъкидланишича, гумонланаётган шахснинг транспорт воситасидан ИШИД террорчилик гуруҳининг байроғи топилган.
Хабар берилишича, гумонланувчи дастлаб полициячига ҳужум қилган, кейин эса ҳодиса жойидан яширинган. Бироз вақтдан сўнг у ҳужжатларни одатий текшириш жараёнида аниқланган.
Эркак қочишга ҳаракат қилган, бироқ қўлга олинган. Полициячилардан қочишга уриниш вақтида у автомобилни пиёдалар устига ҳайдаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)