Таиланд собиқ бош вазири Йинглак Чинават ўз мамлакатида беш йилга озодликдан маҳрум этилишга сиртдан ҳукм қилингач, Бирлашган Араб Амирликларининг Дубай шаҳрига қочиб кетди. Бу ҳақда бош вазир Прают Чан-Оча брифинг чоғида журналистларга маълум қилди, деб ёзади «ТАСС».
«Энди полиция ўз ҳаракатларини ташқи ишлар вазирлиги ва Интерпол билан мувофиқлаштиради», — деди Таиланд ҳукумати раҳбари. «У Дубайда», — дея тасдиқлади у.
Таиланд Олий суди 27 сентябрь, чоршанба куни собиқ бош вазир Чинаватни қишлоқ хўжалик ишлаб чиқарувчиларидан гаровга гуруч сотиб олиш давлат дастурини амалга оширишда масъулиятсизликка йўл қўйганликда сиртдан айбдор деб топди. Таиланднинг янги конституциясига мувофиқ, Чинават ушбу ҳукм устидан 30 кун ичида шикоят аризаси бериш ҳуқуқига эга.
Чинаватнинг «гуруч иши» бўйича қарор 25 августдаёқ чиқарилиши керак эди, аммо бир кун аввал сиёсатчи мамлакатдан яширинча чиқиб кетиб, автомобилда Камбоджага борди, сўнг акаси Таксин Чинават яшайдиган БААга йўл олди.
Изоҳ (0)