Россия ва Украина ўртасида 23 июль куни асирлар алмашинувининг тўққизинчи раунди бўлиб ўтди. Унда ҳар икки томонда 250 дан ортиқ асирлар алмашилди. Бу ҳақда Украина раҳбари Владимир Зеленский хабар берди.
Бу ташаббусга 2 июнь куни Истанбулда бўлиб ўтган музокараларда келишиб олинганди. Асирлар алмашинувининг янги раунди ҳақида Зеленский Telegram’да маълум қилган. Унинг таъкидлашича, ватанига қайтганларнинг аксар қисми 3 йилдан ортиқ вақт давомида Россия асирлигида бўлган.
“Оғир касал ва жиддий яраланган аскарлар уйларига қайтмоқда. Тафсилотларга келсак, Истанбулдаги сўнгги келишувларнинг барча босқичларида биз 1000 дан ортиқ ҳарбийларимизни қайтаришга муваффақ бўлдик. Минглаб оилаларга ўз яқинларини яна бир бор қучоқлаш қувончини тақдим этдик. Бу ҳаракатда қатнашган барчага раҳмат”, деган Зеленский.
Истанбулдаги Россия музокаралар гуруҳи раҳбари Владимир Мединский ҳам Украина—Беларусь чегарасида бўлиб ўтган асирлар алмашинувини тасдиқлаган. У Истанбулдаги ўт очишни тўхтатиш музокараларининг учинчи раундидан сўнг шундай баёнот берган:
“Ўтган сафар муҳокама қилинган барча келишувлар бажарилганини маълум қиламиз. Айни пайтда Украина—Беларусь чегарасида ҳар икки томондан тахминан 250 кишидан иборат ҳарбий асирларнинг сўнгги партияларини алмашиш якунланмоқда. Шундай қилиб, тахминан 1 200 кишилик иккинчи мисли кўрилмаган катта алмашинув якунланди”.
Россия Мудофаа вазирлигига кўра, ватанига қайтишини кутаётган россиялик ҳарбий хизматчилар ҳозирда Беларусь республикаси ҳудудида бўлиб, уларга зарур психологик ва тиббий ёрдам кўрсатилмоқда.
Зеленский 23 июль куни Истанбулда Киев ва Москва ўртасида тинчлик музокараларининг янги раунди бўлиб ўтишини маълум қилганди. Кеча бошланган бу музокараларда Украина делегацияси Россияга август ойи охиригача икки давлат президентлари ўртасида учрашув ташкил этишни таклиф қилган.
Бир соатдан камроқ давом этган тинчлик музокаралари якунлари бўйича ўтказилган матбуот анжуманида Киев томондан Рустем Умеров сўзга чиққан. У мамлакатлар ўртасида маҳбуслар алмашинуви бўйича “янада кўпроқ чоралар кўрилиши лозим”лигини таъкидлаган.
Изоҳ (0)