Бугун, 24 июль куни Таиланд ва Камбоджа ҳарбийлари ўртасида қуролли тўнашувлар бошланди. The Guardian нашрининг хабар беришича, Таиланд қўшнисига ҳаво ҳужумлари билан жавоб қайтарган.
Таиланд расмийларининг таъкидлашича, Камбоджанинг 6 нафар қуролланган аскари мамлакат чегарасига яқинлашган. Орадан кўп ўтмай, ҳавода дронлар ҳам пайдо бўлган. Таиландликлар вазиятни юмшатиш учун уларга огоҳлантириш бергани, бироқ Камбоджа томони бунга ўт очиш билан жавоб қайтарганини даъво қилди.
Ушбу тўқнашувлардан олдинроқ Таиланд элчихонаси эҳтимолий можаро сабаб ўз фуқароларини Камбоджани тарк этишга чақирган эди. Бундан ташқари, мамлакатнинг Камбоджадаги элчиси ҳам 23 июль куни ортга чақириб олинганди.
Reuters’нинг билдиришича, икки мамлакат ўртасидаги чегаралар ёпиб қўйилган. Бугунги тўқнашувлар давомида аллақачон 2 нафар Таиланд фуқароси ҳалок бўлган ва яна 2 киши яраланган. Қўшимча қилинишича, Таиланд Ф-16 қирувчиларини чегарага жойлаштирмоқда. Чегара ҳудудида бошланган қуролли тўқнашувлар интенсивлашиб бормоқда.
“Таиланднинг 86 та қишлоғидан 40 мингга яқин тинч аҳоли хавфсизроқ жойларга кўчирилди”, деди таиландлик расмийлар.
Изоҳ (0)