Хитой ҳукумати WhatsApp мессенжерида хабарларни блоклаб қўйди, деб ёзади TJournal The New York Times’га таяниб. Нашр тахмин қилишича, бундай қарор Хитой Коммунистик партиясининг 18 октябрдаги 19-қурултойи арафасида қабул қилинган.
Парижнинг Symbolic Software компанияси ходими Надим Кобеисси айтиб беришича, ҳукумат блоклаш учун махсус ускунани ишлаб чиққан, мессенжер ишидаги носозликлар эса ўтган ҳафтанинг ўрталаридан бошланган. У блоклашнинг бундай усули «Хитой ҳукуматига хос эмаслиги»ни айтди.
WhatsApp’га эгалик қилувчи Facebook вакиллари вазиятни изоҳлашдан бош тортди.
Гонконг университетидаги интернет-коммуникациялар бўйича мутахассис Локман Цуй айтишича, WhatsApp 24 сентябрь, якшанба куни узилишлар билан ишлаб қолган. Аммо баъзи фойдаланувчилар ҳали ҳам дастур орқали хабар юбора олмоқда.
Шунингдек, WhatsApp’нинг блокланиши ҳақида Weibo ижтимоий тармоғи фойдаланувчилари ҳам маълум қилди.
Изоҳ (0)