Google 350 долларлик «ақлли» курткаларни сотувга чиқарди

Google Levi’s бренди билан ҳамкорликда ишланган «ақлли» курткаларни сотувга чиқарди. Бу ҳақда «VC.ru» хабар бермоқда.

350 долларлик курткалар 27 сентябрдан АҚШдаги бир нечта савдо тармоқларида сотила бошлайди.

2 октябрдан бошлаб эса курткани Levi’s сайтида буюртма қилиш ва бренд дўконларидан харид қилиш мумкин бўлади.

Куртка тўқ кўк Levi’s Commuter моделининг дизайнида яратилди. Унинг енглари Жаcқуард «ақлли» матосидан тикилган сенсор уламалардан иборат.

Google мазкур матони илк марта 2015 йилда кенг омма эътиборига ҳавола этган эди, у куртканинг ташқи жинси қисмига тикиб чиқилган ток ўтказадиган ипчалардан иборат.

Куртканинг сенсор қисми унинг енгига ўрнатилган Bluetooth-модулли махсус қурилма ёрдамида фойдаланувчидан смартфонга сигнал узатади. Куртка ёрдамида мусиқий плеер ёки навигаторни бошқариш мумкин.

Сенсорли енг бир неча ҳаракатларни тушунади, уларнинг ҳар бирини смартфоннинг у ёки бу функцияси орқали бошқариш мумкин. Уларни созлаш учун Android ва iOS қурилмалари учун яратилган махсус дастурдан фойдаланилади.

Шунингдек, тизим куртка эгасига кириш қўнғироқлари ва матнли хабарлар ҳақида маълумот беради.

Levi’s вакилларининг таъкидлашича, курткадаги Bluetooth-модулни ечиб қўйиб, уни ювиш ҳам мумкин. Сенсор енглар исталган турдаги суюқликни одатий жинси матоси каби қабул қилади.

Google «ақлли» курткаларнинг бошқа мамлакатларда сотилиши ҳақидаги маълумотларни ҳозирча ошкор этмаган.