26 сентябрь куни жиноий ишлар бўйича Миробод туман судида Боровский тиббиёт коллежининг 2-курс талабаси Жасурбек Иброҳимовнинг ўлими юзасидан очилган жиноий иш бўйича дастлабки суд эшитуви бўлиб ўтди. Бу ҳақда «Kun.uz» хабар бермоқда.
Судья Матчанов Матчонбой раислигида бўлиб ўтган суд мажлисида жабрланувчилар — марҳумнинг онаси Нилуфар Алиева ва отаси Маҳамаджон Турсунов ҳамда уларнинг адвокати Исмаилова, судланувчи Тўлаганов Исломбек Абдужамилович ва унинг адвокати Тоҳиров, давлат айбловчиси, адлия кичик маслаҳатчиси Бахтиёр Акромов иштирок этди.
Бундан ташқари, суд мажлиси очиқ тарзда ўтганлиги сабабли унда фуқаролар ҳамда ОАВ вакиллари ҳам қатнашди.
Эслатиб ўтамиз, Тошкент шаҳар ИИББ ҳузуридаги Тергов бошқармаси шу йилнинг 2 июнь куни Яшнобод тумани ҳудудидаги 145-мактаб олдида Жасурбек Маҳамад ўғли Иброҳимов унга оғир тан жароҳатлари етказилганлиги сабабли вафот этгани муносабати билан ЖКнинг 104-моддаси 3-қисми «д» банди (жабрланувчининг ўлимига сабаб бўлган қасддан баданга оғир шикаст етказиш) аломатлари билан 1999 йилда туғилган Исломбек Абдужамилович Тўлагановга нисбатан жиноий иш қўзғатилганди. Кейинчалик тергов ишини Тошкент шаҳар прокуратураси ўз зиммасига олди.
Иш бўйича тергов жараёни 29 август куни ниҳоясига етказилган ва мавжуд материаллар жиноий ишлар бўйича Миробод туман судига оширилган эди.
Бугунги мажлисда жабрланувчининг онаси Нилуфар Алимованинг кўрсатмалари тингланди. Адвокатлар ва прокурор томони турли саволлар билан воқеага ойдинлик киритди. Шундан сўнг жабрланувчининг отаси Маҳамаджон Турсунов кўрсатмалари тингланди. У рафиқасининг кўрсатмаларини тасдиқлади.
Навбатдаги суд мажлиси 29 сентябрь кунига белгиланди.
Изоҳ (0)