Ўзбекистон Президенти Шавкат Мирзиёев 26 сентябрь куни Жанубий Корея Миллий Ассамблеяси спикери Чон Се Гюнни қабул қилди. Бу ҳақда ЎзА хабар бермоқда.
Шавкат Мирзиёев меҳмонни қутлар экан, икки мамлакат парламентлари Ўзбекистон ва Жанубий Корея ўртасидаги дўстлик ва стратегик шериклик муносабатларини мустаҳкамлаш, анъанавий яқин ва кенг кўламли ҳамкорликни кенгайтиришда муҳим ўрин тутишини таъкидлади. Жанубий Корея Ўзбекистоннинг муҳим ва ишончли ҳамкорларидан бири экани алоҳида қайд этилди.
Учрашувда Ўзбекистон ва Жанубий Корея парламентлари ва уларнинг алоҳида қўмиталари ўртасидаги ҳамкорлик алоқаларини янада мустаҳкамлаш, парламентларда фаолият юритаётган дўстлик ва ҳамкорлик гуруҳлари ишини фаоллаштириш, икки мамлакат ўртасида ўзаро ташриф ва қўшма тадбирларни мунтазам равишда ташкил этиш муҳимлиги қайд этилди.
Савдо-иқтисодий, инвестиция ва маданий-гуманитар соҳаларда қўшма лойиҳаларни амалга ошириш, шунингдек, халқаро парламентлараро тузилмалар доирасидаги ҳамкорликни мустаҳкамлаш масалаларига алоҳида эътибор қаратилди.
Жанубий Корея Миллий Ассамблеяси спикери Ўзбекистонда қабул қилинган мамлакатни янада ривожлантириш бўйича Ҳаракатлар стратегияси доирасида янги босқичда амалга оширилаётган таркибий ўзгариш ва ислоҳотларни юксак баҳолади ва уларни қўллаб-қувватлашини билдирди.
Чон Се Гюн Президент Шавкат Мирзиёевга самимий қабул учун миннатдорлик билдирди, Жанубий Корея президенти Мун Чже Иннинг саломи ва эзгу тилакларини етказди. Юқори мартабали меҳмон Жанубий Корея раҳбарияти Ўзбекистон Президентининг тез орада ушбу мамлакатга ташриф билан боришини кутаётганини таъкидлади.
«Чон Се Гюн икки давлат парламентлари ҳамкорликда саъй-ҳаракатлар билан бўлажак олий даражадаги учрашувларга тайёргарлик жараёни ҳамда икки томонлама стратегик шериклик муносабатларини янада чуқурлаштиришга амалий ҳисса қўшишини қайд этди», — дейилади ЎзА ахборотида.
Изоҳ (0)