Бухоро вилояти Ромитан туманида 26 сентябрь куни тонги соат 5:30 дан бошлаб, 18:40 гача жами 90 нафар фуқаро туман тиббиёт бирлашмасининг юқумли касалликлар бўлимига кўнгил айниши, қайт қилиш, бош оғриғи ва умумий ҳолсизлик каби касаллик белгилари билан тиббий ёрдам сўраб мурожаат қилган.
Соғлиқни сақлаш вазирлиги (ССВ) матбуот хизматининг «Дарё»га маълум қилишича, улар «Ўткир диарея, овқатдан заҳарланиш» ташхисига гумон қилиниб, шифохонага ётқизилган. «Айни пайтда мазкур шифохона ва унинг бўлимлари зарур дори-дармонлар, инфузион эритмалар, бир маротаба ишлатиладиган шприц ва системалар билан етарли миқдорда таъминланган», — дейилади ССВ ахборотида.
Беморлар билан ўтказилган суҳбат давомида барча беморлар ўз касалликларини 25 сентябрь куни оқшом туман марказидаги «Диёр» тўйхонасида ўтказилган никоҳ тўйи дастурхонига тортилган тухум-баракни истеъмол қилиш билан боғлаган.
Юзага келган эпидемик вазиятни жойига чиқиб ўрганиш, беморларга ва маҳаллий мутахассисларга ўз вақтида ҳар жиҳатдан амалий ёрдам кўрсатиш мақсадида Соғлиқни сақлаш вазирлигининг масъул мутахассисларилари, жумладан, республика Шошилинч тиббий ёрдам илмий маркази директори А.Худаёров, республика Давлат санитария-эпидемиология назорати маркази бош врачи Б.Алматов, Эпидемиология-микробиология ва юқумли касалликлар илмий-текшириш институти директори А.Абдушукуров ва бир гуруҳ етакчи мутахассислар Бухоро вилояти Ромитан туманига юборилган.
Айни пайтда аксарият беморларнинг аҳволи барқарорлашган. Шу сабаб соғлиғи тикланган 25 нафар фуқарога уйига рухсат берилган. «Бухоро вилояти Ромитан туманида кузатилган эпидемик вазият Соғлиқни сақлаш вазирлиги томонидан алоҳида назоратга олинган», — дейилади ССВ ахборотида.
Изоҳ (0)